काठमाडौं — गत १० भदौमा भोटेकोशीमा आएको विनाशकारी बाढीमा ज्यान गुमाएका र बेपत्ता भएकाहरूका छोराछोरीले अब उच्च शिक्षासम्म निःशुल्क पढ्न पाउने भएका छन्। शिक्षा तथा खेलकुद मन्त्रालयले मन्त्रीस्तरीय निर्णय गर्दै उनीहरूका लागि पूर्ण छात्रवृत्तिको व्यवस्था अघि बढाएको हो।
पहिलो चरणमा २७ जना विद्यार्थीले यो सुविधा पाउनेछन्। त्यसपछि थप बालबालिकाको पहिचान गर्दै चरणबद्ध रूपमा अरूलाई पनि छात्रवृत्ति दिइने मन्त्रालयले जनाएको छ।
मन्त्रालयले यसअघि नै ‘सुनिश्चित भविष्य छात्रवृत्ति योजना सञ्चालन निर्देशिका, २०८३’ स्वीकृत गरेर बाढीमा अभिभावक गुमाएका बालबालिकाका लागि विद्यालय तहको निःशुल्क शिक्षाको व्यवस्था गरिसकेको थियो। अब त्यही सुविधालाई उच्च शिक्षासम्म विस्तार गर्ने निर्णय भएको शिक्षा तथा खेलकुद मन्त्री सस्मित पोखरेलले बताएका छन्। मन्त्री पोखरेलका अनुसार पहिलो चरणमा २७ जनालाई छात्रवृत्ति दिइनेछ र त्यसपछि थप पहिचान गर्दै चरणबद्ध रूपमा सुविधा विस्तार गरिनेछ।
प्रस्तावित व्यवस्थाअनुसार निजी विद्यालयमा अध्ययन गरिरहेका बालबालिकाको हकमा शिक्षा विभागले अभिलेख राखेर सम्बन्धित छाता संस्था र स्थानीय तहलाई पत्र पठाउनेछ। सामुदायिक विद्यालयमा अध्ययनरत विद्यार्थीका लागि सम्बन्धित स्थानीय तहलाई पत्राचार गरिनेछ।
उच्च शिक्षा अध्ययन गरिरहेका विद्यार्थीहरूलाई भने विश्वविद्यालय र क्याम्पसहरूमा नियमित रूपमा उपलब्ध हुने छात्रवृत्ति कोटामै थप गरी समावेश गराउन मन्त्रीस्तरीय निर्णयबाट निर्देशन दिइएको छ। यसका लागि मन्त्रालयले विश्वविद्यालय अनुदान आयोगमार्फत आवश्यक व्यवस्था गर्नेछ। यो निर्णयसँगै भोटेकोशी बाढीमा अभिभावक गुमाएका तथा बेपत्ताका सन्तानले जुनसुकै विषयमा पनि उच्च शिक्षासम्म निःशुल्क पढ्न पाउने भएका छन्।
