कपिलवस्तुको बाणगंगा नगरपालिका–३ स्थित राजापानी क्षेत्रमा प्रहरीले चेतावनीस्वरूप हवाइ फायर गरेपछि खैरो हेरोइनसहित दुई जनालाई नियन्त्रणमा लिएको छ।
भारतबाट लागुऔषध भित्र्याएर कारोबार भइरहेको विशेष सूचना पाएपछि लागुऔषध नियन्त्रण ब्युरोको भैरहवा शाखाबाट खटिएको टोलीले आइतबार (कात्तिक १६) उक्त क्षेत्रमा खोजतलास तथा अनुसन्धान गरिरहेको थियो। चेकजाँच गर्न खोज्दा शङ्कास्पद व्यक्तिहरूले प्रहरीमाथि नै प्रतिकार गर्न थालेपछि स्थिति नियन्त्रणमा लिन दुई राउन्ड हवाइ फायर गर्नुपरेको प्रहरीले जनाएको छ।
पक्राउ परेकाहरूको साथबाट २८.८२० ग्राम खैरो हेरोइन, भारतीय नम्बर प्लेट भएको एउटा मोटरसाइकल र दुई थान मोबाइल बरामद भएको छ। पक्राउ पर्नेमा बाणगंगा नगरपालिका–११ का ३४ वर्षीय सलाउदिन मुसलमान र सोही वडाका १२ का २८ वर्षीय उमेश थारू रहेका छन्।
दुवै जनालाई थप अनुसन्धान तथा कारबाहीका लागि इलाका प्रहरी कार्यालय पिपरा, कपिलवस्तु बुझाइएको ब्युरोले जनाएको छ।
