बारा जिल्लाको फेटा गाउँपालिका–३ मा नवनिर्मित आधारभूत अस्पतालको उद्घाटन कार्यक्रम विवादमा पर्दा प्रहरीले चलाएको गोली लागेर १६ वर्षीया किशोरी गम्भीर घाइते भएकी छन्। घटनामा गाउँपालिकाका सवारीसाधन र अस्पतालका संरचनामा लाखौँ रुपैयाँ बराबरको भौतिक क्षति भएको छ।
राष्ट्रिय स्वतन्त्र पार्टीकी सांसद समीक्षा बास्कोटाले दिउँसो १ बजे १५ शय्याको अस्पताल उद्घाटन गर्ने तयारी पूरा भएको थियो। तर उद्घाटनअघि पूर्वगाउँपालिका अध्यक्ष अमिरिलाल साह कलवारको नेतृत्वमा आएको २०–२५ जनाको समूहले मञ्च र शिलालेख तोडफोड गरेको थियो। विवाद हुन सक्ने देखेर स्थानीय प्रशासनले बिहानै वरिष्ठ सईको नेतृत्वमा प्रहरी टोली खटाएको थियो।
घटनास्थलमा रहेका सञ्चारकर्मी रमेश ठाकुरका अनुसार तोडफोडपछि विपक्षीहरू आ–आफ्नो बाटो लागिसकेका थिए र अवस्था सामान्य भइसकेको थियो। त्यसपछि प्रसौनीबाट पुगेका प्रहरी निरीक्षक सुमन लामाले एक्कासि गोली चलाएपछि अवस्था गम्भीर बनेको उनको भनाइ छ। गोली लागेर १६ वर्षीया आदिती पासवानको आन्द्रामा चोट लागेको र शल्यक्रियापछि उनको अवस्था खतरामुक्त रहेको बताइएको छ।
बाराका प्रमुख जिल्ला अधिकारी खडानन्द अधिकारीले प्रहरीबाट गम्भीर त्रुटि भएको बताएका छन्। ‘प्रहरीले घटनास्थलको अवस्था नबुझी एकैपटक हवाई फायर गरेको देखिन्छ,’ उनले भने, ‘एउटा गोली पड्काएको हो, एउटै मान्छेलाई लाग्यो, बरबाद भयो।’
गोली चलेपछि आक्रोशित विपक्षीहरूले गाउँपालिकाका १० वटा मोटरसाइकल, अन्य सवारीसाधन, अस्पतालको सिसा, सीसीक्यामेरा, कुर्सी र टेबल तोडफोड गर्नुका साथै आगजनी गरेका थिए। सङ्घीय सरकारको १२ करोड ८९ लाख रुपैयाँ लागतमा बनेको सो अस्पताल सञ्चालनको अन्तिम तयारीमा थियो। गाउँपालिका अध्यक्ष रुस्तम अन्सारीले पूर्वअध्यक्षको समूहले अस्पताल तोडफोड गरेको दाबी गरेका छन् भने सो समूहले अस्पताल पूर्ण रूपमा निर्माण सम्पन्न नभएको र उपकरण तथा जनशक्तिको व्यवस्था नभएको भन्दै विरोध जनाएको छ।
