पाल्पा जिल्लामा पछिल्लो १० वर्षमा विपद्जन्य घटनामा परी १०२ जनाको मृत्यु भएको छ। यस अवधिमा ३५८ जना घाइते भएका छन् भने पाँच जना बेपत्ता भएका छन्।
जिल्ला विपद् जोखिम न्यूनीकरण तथा व्यवस्थापन समितिका अध्यक्ष एवं प्रमुख जिल्ला अधिकारी भविश्वर पाण्डेका अनुसार २०७४ साउनदेखि गत असारसम्म विपद्का घटनामा ९७ जनाको ज्यान गएको थियो। गत महिना आएको बाढीपहिरो र अविरल वर्षाका कारण थप पाँच जनाको मृत्यु भएको उनले जानकारी दिए।
गत असोज ८ देखि ११ गतेसम्मको अविरल वर्षा, बाढी र पहिरोले जिल्लामा ठूलो भौतिक तथा आर्थिक क्षति पुर्याएको छ। प्रारम्भिक विवरणअनुसार सडक, सिँचाइ, तटबन्ध, खानेपानी, कृषि तथा पशुपन्छी क्षेत्रमा गरी ३७ करोड ७५ लाख ३६ हजार ६९२ रुपैयाँ बराबरको क्षति भएको प्रजिअ पाण्डेले बताए।
प्राकृतिक विपद्का कारण कृषि बालीमा मात्रै करिब एक करोड ५० लाख रुपैयाँ र पशुपन्छी तथा मत्स्य क्षेत्रमा ४५ लाख ७५ हजार रुपैयाँ बराबरको क्षति भएको कृषि ज्ञान केन्द्रले जनाएको छ। भेटेरिनरी अस्पताल तथा पशु सेवा विज्ञ केन्द्रका अनुसार बगनासकाली गाउँपालिकामा सबैभन्दा बढी २७ लाख ७० हजार रुपैयाँ बराबरको क्षति भएको छ। तानसेन नगरपालिकामा १० लाख ८५ हजार र माथागढी गाउँपालिकामा सात लाख २० हजार रुपैयाँ बराबरको क्षति भएको छ।
बाढीपहिरोले १२९ घर तथा संरचनामा क्षति पुर्याएको छ भने ७० वटा खानेपानी आयोजनामा असर परेको छ। खानेपानी संरचनाको मर्मतका लागि दुई करोड ४० लाख रुपैयाँ आवश्यक पर्ने खानेपानी तथा सरसफाइ कार्यालयले जनाएको छ। त्यसैगरी, १४ वटा सिँचाइ आयोजनाको पुनर्निर्माणका लागि तीन करोड ९५ लाख रुपैयाँ र माडीफाँटमा तटबन्ध निर्माणका लागि आठ करोड ८६ लाख रुपैयाँभन्दा बढी आवश्यक पर्ने देखिएको छ।
सडक संरचनामा पनि ठूलो क्षति पुगेको छ। डिभिजन सडक कार्यालय पाल्पाअन्तर्गतका छवटा सडक आयोजनाको मर्मतका लागि १६ करोड ८३ लाख रुपैयाँ लाग्ने अनुमान छ। सिद्धार्थ राजमार्ग, बर्तुङ–तानसेन–रिडी सडक, रुद्रवेणी–वामीटक्सार–खर्वाङ सडक, मदनभण्डारी राजमार्ग र कालीगण्डकी करिडोरका विभिन्न खण्डमा पहिरो खस्ने, सडक भासिने र कटान हुने समस्या देखिएको छ। भिमाद–रामपुर–मित्याल–अरुणखोला सडकको केलादीघाटस्थित पुलमा समेत क्षति पुगेपछि यातायात अवरुद्ध भएको छ। प्रादेशिक सडकअन्तर्गतका आठवटा सडक मर्मत तथा पुनःसञ्चालनका लागि तीन करोड ७५ लाख रुपैयाँ आवश्यक पर्ने सडक पूर्वाधार कार्यालयले जनाएको छ।
आगामी दिनमा हुन सक्ने बेमौसमी वर्षा र त्यसबाट उत्पन्न जोखिमलाई मध्यनजर गर्दै जिल्ला प्रशासन कार्यालयले नागरिकलाई सतर्क रहन आग्रह गरेको छ। सङ्घीय सांसद, जिल्ला समन्वय समिति, राजनीतिक दल, जिल्लाका १० वटै स्थानीय तहका प्रमुख तथा अध्यक्ष र सरकारी कार्यालयका प्रमुखहरूको बैठकले विपद्बाट हुन सक्ने थप क्षति न्यूनीकरणका लागि सबै पक्षलाई जिम्मेवार भएर कार्यक्षेत्रमा खटिन र आवश्यक सावधानी अपनाउन निर्णय गरेको छ।
