काठमाडौँमा दुई व्यक्तिमाथि चलिरहेको छानबिनलाई थप व्यवस्थित बनाउन प्रहरीले छुट्टै अनुसन्धान टोली बनाएको छ। पूर्वप्रधानन्यायाधीश चोलेन्द्र शमशेर जबरासँग सम्बन्ध देखिएका इनम सापकोटा र लगानी बोर्डका पूर्वप्रमुख कार्यकारी अधिकृत सुशील भट्ट यस छानबिनको केन्द्रमा छन्। प्रहरी उपरीक्षक नरहरि रेग्मीले टोलीको नेतृत्व गर्नेछन्। उपत्यका प्रहरी कार्यालयमा कार्यरत रेग्मीको टोलीले जिल्ला प्रहरी परिसर काठमाडौँका अनुसन्धान अधिकृतहरूलाई सहयोग गर्नेछ।
प्रहरीले उनीहरूमाथि राष्ट्र बैंक ऐन, २०५८ र सम्पत्ति शुद्धीकरण निवारण ऐन, २०६४ अन्तर्गतका कसुरमा अनुसन्धान गरिरहेको छ। सापकोटासँग सम्पर्क देखिएपछि भट्टलाई असोज ३१ मा जिल्ला प्रहरी परिसर काठमाडौँले पक्राउ गरेको थियो। सापकोटा भने असोज १४ मा नयाँ दिल्ली जान लागेका बेला त्रिभुवन अन्तर्राष्ट्रिय विमानस्थलबाट पक्राउ परेका थिए।
सुशील भट्ट व्यवसायी दिपक भट्टका दाजु हुन्। दिपक भट्ट सम्पत्ति शुद्धीकरणसम्बन्धी मुद्दामा पुर्पक्षका लागि सिन्धुपाल्चोक कारागारमा छन्। चोलेन्द्रले सापकोटामार्फत दिपक भट्ट र सुलभ अग्रवालको मुद्दामा चलखेल गरेको आशंका छ। अग्रवाल पनि सम्पत्ति शुद्धीकरणको मुद्दामा थुनामा छन्। चोलेन्द्रलाई उपत्यका अपराध अनुसन्धान कार्यालयले पक्राउ गरी असोज ११ को मध्याह्नमा रिहा गरेको थियो।
सापकोटाको मोबाइलको फरेन्सिक जाँचमा भट्टसँग मोबाइल नम्बर र ह्वाट्सएपमार्फत बारम्बार सम्पर्क भएको देखिएको छ। प्रहरीका केही उच्च अधिकृत, व्यवसायी र अदालतका उच्च अधिकृतहरूसँगको उनको सम्पर्कबारे पनि अनुसन्धान भइरहेको छ। सापकोटाको साथबाट १४ सय अमेरिकी डलर र अन्य केही देशका मुद्रा बरामद भएका थिए।
