भारतको राजधानी नयाँ दिल्लीमा मुख्य निर्वाचन आयुक्तविरुद्ध तय गरिएको विरोध मार्चअघि प्रहरी नियन्त्रणमा लिइएकी विद्यार्थी नेतृ नेहा बोरालाई रिहा गरिएको छ। अल इन्डिया स्टुडेन्ट्स एसोसिएसनकी राष्ट्रिय अध्यक्ष बोरालाई शनिबार बिहान रिहा गरिएको हो।
‘लहरा दो तिरंगा’ अर्थात् राष्ट्रिय झण्डा फहराऊ नाम दिइएको विरोध मार्चअघि शुक्रबार दिल्लीको कनट प्लेसबाट बोरा र ‘कक्रोच जनता पार्टी’ का संस्थापक अभिजीत दिपकेलाई हिरासतमा लिइएको थियो। यो समूह मुख्य निर्वाचन आयुक्त ज्ञानेश कुमारविरुद्ध आन्दोलन गर्दै आएको छ।
दिल्ली प्रहरीले बोरामाथि दिल्ली प्रहरी ऐनको धारा ६५ अन्तर्गत हिरासतसम्बन्धी प्रक्रिया पूरा गरेर रिहा गरेको पुष्टि गरेको छ। तर दिपकेलाई भने भारतीय नागरिक सुरक्षा संहिताको धारा १२६ र १७० अन्तर्गत कारबाही अघि बढाइएको छ। उनलाई शनिबार विशेष कार्यकारी मजिस्ट्रेटको अदालतमा पेस गरिने प्रहरीले जनाएको छ।
रिहाइपछि बोराले प्रहरीले आफूलाई अपराधीजस्तो व्यवहार गरेको र लामो समयसम्म वकिलसँग परामर्श गर्न नदिएको आरोप लगाइन्। उनका अनुसार वकिलले पाँचदेखि छ घण्टासम्म प्रयास गरेपछि मात्रै भेट्न दिइएको थियो। उनले मुख्य निर्वाचन आयुक्तलाई पदबाट हटाउन र मतदाता सूचीको विशेष गहन पुनरावलोकन रोक्न माग गरेकी छन्।
