भोजपुर — राष्ट्रिय प्रसारण लाइन टेम्केमैयुङ गाउँपालिकाको वडा नम्बर ६ का दुर्गम बस्तीसम्म पुगेसँगै त्यहाँका बासिन्दाको दैनिकीमा ठूलो परिवर्तन आएको छ। वर्षौँदेखि बिजुलीको पर्खाइमा रहेका घरहरूमा एकाएक उज्यालो छाएपछि पढाइ, सञ्चार र घरधन्दा चलाउने तरिका नै फेरिएको स्थानीय बताउँछन्।
बिजुलीसँगै गाउँमा इन्टरनेट र टेलिभिजनको प्रयोग सुरु भएको छ। भौगोलिक रूपमा फैलिएको यो वडाका टाढाटाढाका बस्तीसम्म लाइन पुगेकाले सूचना र सञ्चारको पहुँचबाट बाहिर रहेका नागरिकले अहिले सहजता महसुस गरिरहेका छन्।
स्थानीय बलबहादुर राईका अनुसार बिजुलीले बालबालिकाको पढाइदेखि घरायसी काम र साना उद्योग चलाउनसम्म सघाएको छ। पहिले उज्यालो नहुँदा केटाकेटीको अध्ययनमा समस्या पर्थ्यो भने अन्न कुटानीपिसानी गर्न पनि हैरान थियो।
वडाध्यक्ष सूर्यप्रसाद नेपालले सीमित बजेटका बाबजुद विद्युत् विस्तारलाई प्राथमिकता दिएर काम गर्दा परिणाम देखिएको बताए। भूगोल चुनौतीपूर्ण भएकाले सबै बस्तीमा एकैपटक लाइन पुर्याउन गाह्रो रहेको भए पनि आवश्यकता हेरेर काम अघि बढाइएको उनको भनाइ छ।
बिजुली पुगेपछि गाउँलेहरूले विद्युतीय मिलबाट अन्न कुटानीपिसानी गर्न थालेका छन्, जसले परम्परागत धान–चामल कुट्ने मेहनत र समय घटाएको छ। फर्निचरजस्ता घरेलु उद्योग चलाउन सजिलो भएपछि स्थानीय उत्पादन र आयआर्जनका काममा समेत टेवा पुगेको वडाले जनाएको छ।
