काठमाडौँ । भोटेकोशी बाढीबाट घरबार गुमाएका परिवारका लागि सोही क्षेत्र आसपासमै स्थायी आवास बनाउने तयारी अघि बढेको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले उपयुक्त जग्गा पहिचान गर्न भौगोलिक अध्ययन गरिरहेको जनाएको छ ।
सोमबार सिंहदरबारमा बसेको प्रतिनिधिसभाको विशेष समितिको बैठकमा प्राधिकरणका भूगर्भविद् डा. प्रकाश पोख्रेलले बाढीले पूर्ण क्षति पुर्याएका स्याफ्रुबेसी, बेत्रावतीदेखि त्रिशूलीसम्मका पीडितलाई नयाँ बस्ती त्यही क्षेत्र वरपर नै बसाउने योजना रहेको जानकारी दिए । अध्ययन सकिएपछि मात्रै आवास निर्माणको प्रक्रिया अघि बढ्ने उनको भनाइ थियो ।
बाढीपछिको उद्धार र पुनर्स्थापनाका काम पनि जारी छन् । प्राधिकरणले घटनापछि १६ वटा परिचालन टोली बनाएर सम्बन्धित क्षेत्रका सम्पर्क व्यक्तिमार्फत खोज, उद्धार, राहत र पुनर्स्थापनाको काम गरिरहेको छ । दुई वटा प्रयोगशालामार्फत मृतकको पहिचानका लागि डिएनए सङ्कलन र प्रोफाइल तयार गर्ने काम भइरहेको छ ।
प्राधिकरणका अनुसार १६ सय शवको डिएनए सङ्कलन भइसकेको छ भने हालसम्म १५० शवको पहिचानको काम भइरहेको छ । सबै डिएनएसम्बन्धी काम एक महिनाभित्र पूरा हुने अपेक्षा गरिएको छ ।
यसैबीच, बाढीले क्षति पुर्याएका सडक, पुल र झोलुङ्गे पुलका अस्थायी तथा वैकल्पिक मार्ग निर्माण र प्राविधिक जाँचको काम पूर्वाधार विकास मन्त्रालयको नेतृत्वमा भइरहेको छ ।
