काठमाडौँ । राष्ट्रिय स्वतन्त्र पार्टी (रास्वपा) को सचिवालय बैठकले मधेस प्रदेश र त्यहाँका जिल्लामा देखिएका समस्या समाधानका लागि तयार पारिएको अध्ययन प्रतिवेदनमाथि छलफल थालेको छ। शनिबार बसेको बैठकमा सो प्रतिवेदन अध्ययनका लागि पेस गरिएको पार्टी प्रवक्ता जगदीश खरेलले जानकारी दिए।
सह–महामन्त्री हरि ढकालको नेतृत्वमा गठन भएको कार्यदलले मधेस अडिटका सन्दर्भमा उक्त प्रतिवेदन तयार पारेको हो। प्रतिवेदनमा मधेसमा देखिएका समस्या र तिनको समाधानका उपाय समेटिएको बताइएको छ। प्रवक्ता खरेलका अनुसार प्रतिवेदनको अध्ययनपछि पार्टीले त्यसका आधारमा आगामी कदम चाल्नेछ।
बैठकले अर्को महत्त्वपूर्ण निर्णय पनि गरेको छ। चिनियाँ कम्युनिस्ट पार्टीको निमन्त्रणामा रास्वपाको एक प्रतिनिधिमण्डल छिट्टै चीन भ्रमणमा जाने भएको छ। सह–महामन्त्री विपिन आचार्यको नेतृत्वमा केही सदस्य सम्मिलित टोलीले चीन भ्रमण गर्ने तय भएको प्रवक्ता खरेलले बताए।
शनिबार १४ कात्तिकमा बसेको सचिवालय बैठकमा मधेसको अवस्थाबारे गम्भीर छलफल भएको र प्रतिवेदनले पार्टीको भावी रणनीतिमा सघाउने अपेक्षा गरिएको छ।
