सुनसरीको धरान उपमहानगरपालिका–१४ विजयपुरस्थित बुढासुब्बा मन्दिरमा महानवमीका दिन भक्तजनको उल्लेख्य भीड लागेको छ। महानवमीमा कुखुराको भाले बलि चढाएर दुर्गा भवानीको विशेष पूजाआराधना गर्ने परम्परा रहेकाले बिहानैदेखि दर्शनार्थीको चहलपहल बढेको हो।मन्दिरका पुजारी डम्बर आलेमगरका अनुसार मनोकामना पूरा होस् भन्ने कामनासहित पूजा गर्ने र भाकल पूरा भएपछि भाले चढाउने यहाँको चलन छ। सुख, शान्ति र समृद्धिको विश्वास बोकेर भक्तजनले पूजाआराधना गरिरहेका छन्।यस मन्दिरमा पूर्वी नेपालका विभिन्न जिल्लाका साथै भारतको सिक्किम र दार्जिलिङ तथा भुटानबाट समेत दर्शनार्थी आउने गरेका छन्। तरहराकी निर्मला बस्नेत परिवारको सुखशान्तिको कामनासहित बुढासुब्बा आएकी थिइन्। मनोकामना पूरा हुने विश्वासका साथ आफू हरेक वर्ष भाकलअनुसार भाले चढाउन आउने गरेको उनले बताइन्।बडादसैँ सुरु भएसँगै दर्शनार्थी बढेका छन्। मन्दिर नजिकै करिब ३० वर्षदेखि व्यापार गर्दै आएका एमडी जम्मेलका अनुसार पूजासामग्रीसँगै बालबालिकाका लागि खेलौनाको बिक्री पनि बढेको छ।एक दशकअघिसम्म मन्दिर परिसरका बाँसमा नाम लेख्दा प्रेम अमर हुन्छ भन्ने विश्वास थियो। तर समयक्रममा बाँस मर्न थालेपछि व्यवस्थापन समितिले तारजाली लगाएको छ, र अहिले बाँसमा माला बाँध्ने क्रम बढेको छ।बुढासुब्बामा भाले, अण्डा र फलफूल चढाइन्छ भने नजिकैको गौरिनी मातालाई पोथी कुखुरा चढाउने परम्परा छ; पोथी नपाइए अण्डा चढाइन्छ। विजयपुरमै रहेका दन्तकाली, पिण्डेश्वर र पञ्चकन्यामध्ये दसैँका बेला दन्तकालीमा भने सबैभन्दा बढी भीड हुन्छ।