अस्ट्रेलियाको क्वीन्सल्यान्ड राज्यको गोल्ड कोस्टमा नेपाली समुदायको क्रिकेट प्रतियोगिता गोल्ड कोस्ट नेप्लिज प्रिमियर लिग (जीसीएनपीएल) को तेस्रो संस्करण आगामी वर्षको मार्चमा हुने भएको छ। लिगका निर्देशक किशोर तिवारीले मार्चमा प्रतियोगिता आयोजना गर्ने तयारी भइरहेको बताएका छन्।
यसपटक प्रतियोगितामा पाँच टोलीले प्रतिस्पर्धा गर्नेछन्। हिमालयन हिट्स, यति स्ट्राइकर्स, गोल्ड कोस्ट सुपर किड्स र गोर्खा थन्डर्ससँगै सगरमाथा टाइटन्स पहिलोपटक लिगमा सहभागी हुँदैछ। खेलहरू प्राकृतिक घाँसको पिचमा खेलाइनेछ।
खेलाडी छनोटका लागि आयोजकले सन् २०२६ को डिसेम्बरमा अक्सन गर्ने योजना बनाएको छ। क्वीन्सल्यान्डभरका खेलाडीले सहभागिताको अवसर पाउनेछन् भने प्रत्येक टोलीले राज्यबाहिरबाट बढीमा एक जना खेलाडी टोलीमा समावेश गर्न सक्नेछ। अघिल्ला चार टोलीले गत वर्षको दर्ताका आधारमा गोल्ड कोस्ट र ब्रिस्बेनबाट एक-एक जनालाई टोलीमै कायम राख्न पाउनेछन्। सगरमाथा टाइटन्सले भने ती टोलीले नराखेका खेलाडीमध्ये दुई जनालाई अक्सनअघि छनोट गर्न पाउनेछ।
प्रतियोगिताका खेलहरूको व्यावसायिक स्तरमा प्रत्यक्ष अनलाइन प्रसारण गरिनेछ। सामाजिक सञ्जालका इन्फ्लुएन्सरहरूसँग मिलेर प्रचार गर्ने तयारी पनि आयोजकले गरेको छ। नेपाली राष्ट्रिय क्रिकेट खेलाडी अविनाश बोहरा लिगका ब्रान्ड एम्बासडर रहेका छन् भने हिरोशी खनाल यस संस्करणका ‘अफिसियल फेस’ का रूपमा नियुक्त भएका छन्।
निर्देशक तिवारीका अनुसार यसपटक गोल्ड कोस्टसहित क्वीन्सल्यान्डभरका खेलाडीलाई बढी अवसर दिने र क्रिकेटमार्फत त्यहाँको नेपाली समुदायलाई जोड्ने उद्देश्य लिइएको छ।
सन् २०२५ मा चार टोलीको सहभागितामा सुरु भएको प्रतियोगिताको पहिलो संस्करणमा गोल्ड कोस्ट सुपर किङ्सले उपाधि जितेको थियो भने गोर्खा थन्डर्स उपविजेता बनेको थियो। सन् २०२६ मा सम्पन्न दोस्रो संस्करणमा यति स्ट्राइकर्स च्याम्पियन बन्दा हिमालयन हिट्स उपविजेता बनेको थियो। प्रतियोगिताको खेलस्थल र विस्तृत खेलतालिका भने तय हुन बाँकी रहेको आयोजकले जनाएको छ।
