वीरगन्ज — पर्सा प्रहरीले जिल्लाभर सञ्चालन गरेको पटका नियन्त्रण अभियानका क्रममा तीन दिनको अवधिमा करिब साढे तीन लाख रुपैयाँ बराबरका आतिशबाजीजन्य पदार्थ नियन्त्रणमा लिएको छ। यही महिनाको २१ गतेदेखि सुरु भएको विशेष अभियानमा ११ थरिका पटका बरामद भएका हुन्।
जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक चक्रबहादुर मल्लका अनुसार नियन्त्रणमा लिइएका सामग्रीमा खुर्सानी पटका, चक्र, फुलझरी, रकेट पटका, आलु बम र झिरझिरेलगायत ११ प्रकारका पटका छन्।
विस्फोटक पदार्थको प्रयोगबाट धनजनको क्षति हुनुका साथै आगलागीको जोखिम उच्च रहने भएकाले जिल्लामा पटकाजन्य सामग्रीको ओसारपसार तथा बेचबिखनमा कडाइ गरिएको प्रहरीले जनाएको छ। सोही अभियानको क्रममा उक्त परिमाणको पटका बरामद भएको हो।
पटकाजन्य पदार्थको ओसारपसार, बेचबिखन, भण्डारण तथा उत्पादन कानुनद्वारा पूर्ण रूपमा निषेध गरिएको प्रहरीले स्मरण गराएको छ। त्यस्ता गैरकानुनी कार्यमा संलग्न नहुन सर्वसाधारणलाई सचेत गराउँदै प्रहरीले विस्फोटक आतिशबाजीको जोखिमबाट जोगिएर चाडपर्व हर्षोल्लासका साथ मनाउन आग्रह गरेको छ।
