नेपाली कांग्रेसको १५औँ महाधिवेशनबाट ३५ वर्षमुनिका २१ जना केन्द्रीय समितिमा पुगेका छन्। विधान संशोधनमार्फत युवालाई केन्द्रमा ठाउँ दिने निर्णयपछि छोटो समय राजनीतिमा लागेकाहरू पनि केन्द्रीय राजनीतिमा पुग्ने अवसर पाएका हुन्।
गत असोज १८ देखि २३ गतेसम्म चलेको महाधिवेशनबाट प्रत्येक प्रदेशबाट एक पुरुष र एक महिला गरी १४ जना तथा देशभरबाट खुला प्रतिस्पर्धामार्फत ७ जना गरी कुल २१ जना ३५ वर्षमुनिका केन्द्रीय सदस्य चुनिएका हुन्।
यही समूहबाट केन्द्रीय सदस्य बनेका छन् नेपाल विद्यार्थी संघ काठमाडौँका अध्यक्ष अंशुल केसी। उनले बागमती प्रदेशतर्फ ३५ वर्षमुनिका युवा खुला समूहबाट उम्मेदवारी दिएर जित हासिल गरेका हुन्। एक सिटका लागि पाँच जनाबीच भएको प्रतिस्पर्धामा केसीले एक हजार ९१० मत ल्याए भने उनका निकटतम प्रतिस्पर्धी मुकेश घिमिरेले एक हजार ७७७ मत प्राप्त गरे। प्रतिस्पर्धामा कृष्ण डंगोल, बद्रीराम थापा र उमंग लोहनी पनि थिए।
दोस्रो संविधानसभा निर्वाचनदेखि राजनीतिमा सक्रिय भएका केसीले नेपाल कमर्स क्याम्पसको इकाइ हुँदै नेविसंघ काठमाडौँ जिल्लामा काम गरेका थिए। काठमाडौँ महानगरपालिका वडा नम्बर ३१ का स्थायी बासिन्दा उनको योजना नेविसंघको महाधिवेशनमा केन्द्रीय पदका लागि प्रतिस्पर्धा गर्ने थियो। तर कांग्रेसको महाधिवेशन पहिले भएपछि उनी युवा क्लस्टरबाट उम्मेदवार बनेर केन्द्रीय सदस्यमा निर्वाचित भए।
केसीका बुबा अशोक केसी कांग्रेसकै तर्फबाट निर्वाचित भई काठमाडौँ महानगरपालिका वडा नम्बर ३१ का वडा सदस्य छन्। परिवारबाटै राजनीतिमा आउने प्रेरणा पाएको उनको भनाइ छ।
केन्द्रीय समितिमा पुगेपछि आफ्नो योजना समितिलाई ठूलो क्लबजस्तो नभई चलायमान बनाउने रहेको केसी बताउँछन्। दलीय स्वार्थ कहिल्यै सार्वजनिक हितभन्दा माथि हुन नहुने उनको धारणा छ। नेविसंघमा काम गरेको अनुभवका आधारमा शैक्षिक मुद्दा उठाउँदै आएको र आगामी दिनमा पनि पार्टीका कार्यक्रमलाई मैदानमै गएर पूरा गर्ने उनले बताएका छन्।
