मंगलबार बिहान साउदी अरेबियाको राजधानी रियादमा विस्फोटका ठूला आवाज सुनिए। केहीबेरपछि साउदी नेतृत्वको सैन्य गठबन्धनले हुथी विद्रोहीले राजधानीतर्फ हानेको ब्यालेस्टिक क्षेप्यास्त्र हवाई प्रतिरक्षा प्रणालीले खसालेर नष्ट गरेको जानकारी दियो।
घटनाका बेला राजधानीमा रहेका समाचार संस्था एएफपीका संवाददाताले लगातार विस्फोटको आवाज सुनेका थिए। त्यसपछि सर्वसाधारणको मोबाइलमा हवाई आक्रमणको सम्भावित जोखिमबारे सचेत गराउँदै सुरक्षित ठाउँमा बस्न आग्रह गरिएका सन्देश पुगेका थिए। साउदी नागरिक सुरक्षा निकायले भने केही समयपछि तत्कालको खतरा टरेको जनाएको छ।
गठबन्धनले सोमबार राति नै देशको दक्षिणी भागतर्फ हानिएको अर्को क्षेप्यास्त्र पनि प्रतिरक्षा प्रणालीले नष्ट गरेको बताएको छ। यो समूहले हुथी विद्रोही इरानको समर्थनमा सञ्चालित रहेको बताउँदै आएको छ।
यमनमा जारी द्वन्द्वबीच जुलाईमा युद्धविराम घोषणा भए पनि साउदीमाथि हुथीका आक्रमण रोकिएका छैनन्। पछिल्ला हप्तामा यस्ता आक्रमण दैनिकजसो भइरहेका छन्।
आइतबार मात्र हुथीले रियादको व्यापारिक क्षेत्रमा आक्रमण गरेको दाबी गरेको थियो। त्यो घटनामा अरामको टावरमा क्षति पुगेको प्रत्यक्षदर्शीले बताएका थिए भने साउदी अधिकारीले खसेको क्षेप्यास्त्रका टुक्राले भवनमा सामान्य क्षति पुगेको बताएका थिए। मंगलबार साउदी प्रेस एजेन्सीले सार्वजनिक गरेको तस्बिरमा रियाद क्षेत्रका उपगभर्नरलगायत अधिकारी क्षतिग्रस्त भवनको निरीक्षण गर्दै गरेको देखिन्छ, जसमा भवनका केही तला क्षतिग्रस्त देखिएका छन्।
हुथीले यसअघि अरामका तेल ट्याङ्कर, प्रशोधन केन्द्र, भण्डारण क्षेत्र र मुख्यालयलाई पटकपटक निशाना बनाएको छ। सन् २०१५ को मार्चमा हुथीले यमनको अन्तर्राष्ट्रिय मान्यताप्राप्त सरकार हटाएर राजधानी सानामाथि नियन्त्रण जमाएपछि साउदी नेतृत्वको गठबन्धनले उनीहरूविरुद्ध सैन्य कारबाही थालेको थियो।
