रियादस्थित नेपाली दूतावासले साउदी अरेबियामा रहेका नेपाली नागरिकलाई विशेष सतर्कता अपनाउन आग्रह गरेको छ। पछिल्लो समय त्यहाँको सुरक्षा अवस्था संवेदनशील बनेपछि दूतावासले विशेष सूचना जारी गरेको हो। सूचनामा अत्यावश्यक कामबाहेक घरबाहिर ननिस्कन भनिएको छ। सुरक्षा अवस्था परिवर्तन भइरहेको अवस्थामा आधिकारिक सूचनालाई नै आधार मान्नुपर्ने दूतावासको भनाइ छ।
दूतावासले पाँच बुँदामा सुझाव दिएको छ। साउदीका आधिकारिक निकायले जारी गर्ने सुरक्षा निर्देशन पूर्ण रूपमा पालना गर्नुपर्ने उल्लेख छ। सुरक्षा चेतावनी जारी भएको समयमा बाहिर ननिस्कन पनि आग्रह गरिएको छ। सामाजिक सञ्जाल प्रयोग गर्दा विशेष ध्यान दिन भनिएको छ। आधिकारिक निकायबाट पुष्टि नभएका समाचार, सूचना, तस्बिर र भिडियो अरूलाई नपठाउन र फेसबुक, टिकटकजस्ता माध्यममा पोस्ट वा सेयर नगर्न कडा निर्देशन दिइएको छ। अपुष्ट जानकारीका भरमा कुनै कदम नचाल्न र सही जानकारी मात्र आदानप्रदान गर्न पनि आग्रह गरिएको छ।
हवाई यात्रा गर्ने तयारीमा रहेकालाई पनि सावधानी अपनाउन भनिएको छ। साउदीबाट नेपाल वा अन्य देश जानुअघि उडानको तालिका परिवर्तन भए वा नभएको सम्बन्धित वायुसेवा कम्पनी वा आधिकारिक स्रोतबाट यकिन गरेर मात्र विमानस्थल जान सुझाइएको छ। आवश्यक परेमा रियादस्थित दूतावास वा जेद्दास्थित महावाणिज्यदूतावासमा तत्काल सम्पर्क गर्न सकिने जनाइएको छ।
