बलिउडका बादशाह शाहरूख खानको आगामी फिल्म ‘किङ’ प्रदर्शनमा आउनुअघि नै व्यापारिक कीर्तिमान बनाउन सफल भएको छ। फिल्मले हलमा लाग्नुअघि नै विभिन्न अधिकार बिक्रीबाट करिब ६६५ करोड भारतीय रुपैयाँ उठाइसकेको छ। यो रकमले फिल्म उद्योगमा शाहरूखको बजार मूल्य कति बलियो छ भन्ने देखाएको छ।
सिद्धार्थ आनन्दले निर्देशन गरेको यो फिल्ममा शाहरूखसँगै दीपिका पादुकोण, रानी मुखर्जी, अभिषेक बच्चन र सुहाना खान देखिनेछन्। रेड चिलिज र मार्फ्लिक्सले निर्माण गरेको फिल्मको लागत सुरुमा २०० करोड भारू अनुमान गरिएको थियो, तर छायाङ्कन अगाडि बढ्दै जाँदा खर्च बढेर करिब ४०० करोड पुगेको छ। शाहरूखको पारिश्रमिक जोड्दा कुल लागत ५०० करोड नाघ्ने अनुमान छ। यससँगै ‘किङ’ रामायणपछि बलिउडको दोस्रो महँगो फिल्म बनेको छ।
विदेशी वितरण अधिकारबाट फिल्मले १७५ करोड भारूको न्यूनतम ग्यारेन्टी पाएको छ, जुन कुनै पनि भारतीय फिल्मका लागि अहिलेसम्मकै उच्च हो। स्वदेशमा हल अधिकार २५० करोड भारूमा बिक्री भएको छ। नेटफ्लिक्सले डिजिटल अधिकार १५० करोडमा किनेको छ भने सङ्गीत अधिकार ६५ करोड र स्याटेलाइट अधिकार २५ करोडमा बिक्री भएका छन्।
फिल्म आगामी डिसेम्बर २४ मा प्रदर्शनमा आउने तयारीमा छ। व्यापार विश्लेषकहरूका अनुसार फिल्मले लागत उठाउन करिब ५०० करोड भारूको नेट कमाइ गर्नुपर्नेछ। तर, उल्लेखित आँकडा व्यापारिक अनुमानमा आधारित छन् र अन्तिम हिसाब फरक पर्न सक्छ।
