ललितपुरको लगनखेल चोक नजिकै नयाँ सार्वजनिक पार्क खुलेको छ। ललितपुर महानगरपालिकाले न्हु पोखरीसँगै निर्माण गरेको ‘न्हु पुखु एभेन्यू’ नामको पार्क बिहीबार उद्घाटन गरिएको हो। स्विस सरकारको आर्थिक र प्राविधिक सहयोगमा यो पार्क बनेको हो।
पार्कको उद्घाटन नगर प्रमुख चिरीबाबु महर्जन र स्विट्जरल्याण्डको राष्ट्रिय परिषद्का अध्यक्ष पियरे आन्दे्र पेजले संयुक्त रूपमा गरे। महानगरले यस सार्वजनिक स्थललाई नेपाल र स्विट्जरल्याण्डबिचको अटुट मित्रताको प्रतीकका रूपमा लिएको छ।
महानगरका अनुसार पार्क निर्माणमा दुई करोड २५ लाख रुपैयाँ खर्च भएको छ। वडा नं. ५ मा रहेको पार्कको क्षेत्रफल दुई रोपनी चार आना छ।
उद्घाटन कार्यक्रममा बोल्दै नगर प्रमुख महर्जनले नेपाल र स्विट्जरल्याण्डबिच कूटनीतिक सम्बन्ध स्थापना भएको ७० वर्ष पुगेको अवसरमा स्विस सरकारले पार्क बनाउने प्रस्ताव ल्याएको र महानगरले त्यसलाई स्वीकार गरेको बताए। त्यस ठाउँमा रहेका नचाहिने संरचना हटाएर पार्क बनाइएको उनले जानकारी दिए। महानगर र महानगरवासीले आफ्ना सन्तानको स्याहार गरेझैँ गरी पार्कको स्याहार गर्ने उनको भनाइ थियो। उनले स्विस प्रतिनिधिमण्डललाई नेपाल दोहोर्याएर भ्रमण गर्न निम्तो दिँदै त्यतिबेला यहाँका अन्य पोखरीमा पनि पानी भरिभराउ हुने र रातमा जुनकिरी देखिने बताए।
स्विस राष्ट्रिय परिषद्का अध्यक्ष पेजले ललितपुर महानगरलाई धन्यवाद दिँदै नेपालमा जस्तै स्विट्जरल्याण्डमा पनि धेरै हिमाल रहेको बताए। पार्कले दुई देशबिचको सम्बन्धलाई अझ प्रगाढ बनाएको उनको भनाइ थियो। पानीले भरिएको पोखरी हेर्न नेपाल फेरि आउने इच्छा उनले व्यक्त गरे।
