बङ्गालको खाडीमा बनेको चक्रवात अरनबको असरका कारण आगामी कात्तिक १३ र १४ गते देशका विभिन्न भागमा भारी वर्षा हुन सक्ने भन्दै राष्ट्रिय विपद् जोखिम न्यूनीकरण तथा व्यवस्थापन प्राधिकरणले सर्वसाधारणलाई उच्च सतर्कता अपनाउन आग्रह गरेको छ। चट्याङ र हावाहुरीसहितको वर्षाको सम्भावना रहेकाले जोखिमयुक्त क्षेत्रमा विशेष सावधानी अपनाउन प्राधिकरणले अनुरोध गरेको हो।
प्राधिकरणका अनुसार कोशी, मधेस, बागमती, गण्डकी र लुम्बिनी प्रदेशका धेरै ठाउँमा मेघगर्जन र चट्याङसहित मध्यम वर्षा हुने तथा केही ठाउँमा भारी वर्षा हुने अनुमान छ। कर्णाली र सुदूरपश्चिम प्रदेशका केही स्थानमा पनि वर्षा हुन सक्ने जनाइएको छ। उच्च पहाडी तथा हिमाली क्षेत्रमा भने भारी हिमपातसँगै हिमआँधी र हिमपहिरोको उच्च जोखिम रहेको प्राधिकरणले बताएको छ।
प्राधिकरणका प्रवक्ता रामबहादुर केसीले जल तथा मौसम विज्ञान विभागको पूर्वानुमानका आधारमा चक्रवातको प्रभाव शुक्रबार कात्तिक १३ गतेदेखि नेपालमा देखिन सक्ने जानकारी दिएका छन्। सम्भावित विपद्बाट जोगिन उच्च पहाडी तथा हिमाली क्षेत्रको यात्रा नगर्न, अत्यावश्यक कामबाहेक अन्य यात्रा स्थगित गर्न र नदी तथा खोलाका किनार वा बाढीको जोखिम भएका स्थानमा नबस्न उनले आग्रह गरेका छन्।
मौसमसम्बन्धी पूर्वानुमान र आधिकारिक सूचनालाई निरन्तर हेर्न तथा जोखिम देखिएमा तुरुन्त सुरक्षित स्थानमा जान पनि प्राधिकरणले भनेको छ। आपतकालीन अवस्थामा मौसमसम्बन्धी जानकारीका लागि ११५५, विपद् सहायताका लागि १२३४, नेपाल प्रहरीका लागि १०० र पर्यटक प्रहरीका लागि ११४४ मा सम्पर्क गर्न सकिने प्रवक्ता केसीले जानकारी दिएका छन्।
