काठमाडौं — ८९ वर्षदेखि अनसुल्झेको उड्डयन इतिहासको चर्चित रहस्य सुल्झाउने आशा यसपटक पनि पुरा भएन। अमेरिकी महिला पाइलट अमेलिया इयरहार्टको विमान खोज्न प्रशान्त महासागरको निकुमारोरो टापु गएको अनुसन्धान टोलीले उपग्रह तस्बिरमा देखिएको अनौठो वस्तु विमानको अवशेष नभई समुद्रले बगाएर ल्याएका रूखका टुक्रा भएको निष्कर्ष निकालेको छ।
पर्ड्यु विश्वविद्यालय, पर्ड्यु रिसर्च फाउन्डेसन र आर्कियोलोजिकल लिगेसी इन्स्टिच्युटको संयुक्त टोली उपग्रह तस्बिरमा लगुनमा देखिएको ‘ताराइया वस्तु’ खोज्न टापु पुगेको थियो। चारैतिर फैलिएका भाग र धातुजस्तै चमक भएकाले त्यो इयरहार्टको विमान हुन सक्ने अनुमान गरिएको थियो। तर अक्टोबर १९ मा सार्वजनिक विवरण अनुसार चमकिलो देखिनुको कारण वस्तुमा जमेको कार्बोनेटयुक्त तह थियो।
अमेलिया र उनका नेभिगेटर फ्रेड नुनान सन् १९३७ जुलाई २ मा पपुवा न्युगिनीको लाबाट लकहिड इलेक्ट्रा विमानमा उडेका थिए। संसार परिक्रमाको क्रममा उनीहरूको अर्को गन्तव्य हाउल्यान्ड टापु थियो। इन्धन घटिरहेको भन्ने अन्तिम रेडियो सन्देशपछि उनीहरूसँग सम्पर्क टुट्यो र त्यसयता विमान फेला परेको छैन।
सन् १९३२ मा एक्लै एटलान्टिक महासागर पार गर्ने पहिलो महिला बनेकी अमेलियाको यो सबभन्दा महत्त्वाकांक्षी उडान थियो। टोलीले खोजी जारी राख्ने जनाएको छ।
