सुनसरीमा सप्तकोशीमा पौडी खेल्ने क्रममा आइतबार साँझ बेपत्ता भएका एक युवक सोमबार बिहान मृत फेला परेका छन्। बराहक्षेत्र नगरपालिका–१० बकुल्लाचापका २३ वर्षीय ओसन कोइरालाको शव सोमबार बिहान फेला परेको हो।जिल्ला प्रहरी कार्यालयका सूचना अधिकारी चन्द्रबहादुर खड्काका अनुसार कोइराला आइतबार साँझ साथीहरूसँग पौडी खेल्ने क्रममा नदीमा डुबेका थिए। घटनापछि खोजी गर्दा सोमबार बिहान उनको शव भेटिएको हो।मृतकको शव परीक्षणका लागि इनरुवास्थित जिल्ला अस्पताल पठाइएको इलाका प्रहरी कार्यालयले जनाएको छ। घटनाबारे थप अनुसन्धान भइरहेको प्रहरीले जनाएको छ।नदीमा पौडी खेल्दा आवश्यक सतर्कता अपनाउन प्रहरीले सर्वसाधारणलाई आग्रह गरेको छ। विशेष गरी चाडपर्वको समयमा नदी–नाला किनारमा घुम्न जानेहरूको संख्या बढ्ने भएकाले जोखिमबाट बच्न सचेत रहन अनुरोध गरिएको छ।