सप्तरीको सुरुङ्गा नगरपालिका–९ टिकुलियामा एक २५ वर्षीय महिलामाथि सामूहिक बलात्कार भएको आरोप लागेको छ। घटनामा संलग्न भएको आरोप लागेका तीनजना युवकको पहिचान भइसकेको र उनीहरूलाई नियन्त्रणमा लिन प्रहरीले खोजी गरिरहेको जनाएको छ।
पीडितको जाहेरीअनुसार सिरहा घर भएकी उनी विजयादशमी मनाउन बहिनीको घर आएकी थिइन्। गत बुधबार दुर्गा पूजाको मूर्ति जलप्रवाह गर्न बलान नदी पुगेकी उनी ट्याक्टरमा फर्किंदै गर्दा बाटोमा इन्धन सकिएर ट्याक्टर रोकिएको थियो। त्यसपछि उनी एक्लै पैदल घर फर्किने क्रममा घटना भएको जाहेरीमा उल्लेख छ।
आरोपअनुसार बाटोछेउमा बसेका तीनजनाले उनलाई नियन्त्रणमा लिएर मुख थुनी नजिकैको आँपको बगैँचामा लगेर जबर्जस्ती करणी गरी बेहोस अवस्थामा छाडेर भागेको बताइएको छ। राति अबेरसम्म पनि घर नपुगेपछि खोजीमा निस्किएका आफन्त र स्थानीयवासीले उनलाई उद्धार गरेका थिए। आरोपितमध्ये एक १९ वर्षीय र दुई २१ वर्षमुनिका युवा रहेको बताइएको छ।
परिवारका अनुसार घटनापछि गाउँका केही अगुवाले मामला मिलाउन प्रलोभन दिएको आरोप पनि लागेको छ। जाहेरी बिहीबार साँझ करिब ५ बजे इलाका प्रहरी कार्यालय कडरबोनामा दर्ता भएको हो। जिल्ला प्रहरी कार्यालय सप्तरीका प्रहरी उपरीक्षक रूपक खड्काले घटनाबारे थप अनुसन्धान भइरहेको जानकारी दिएका छन्।
