सप्तरीमा हात्तीलाई मारेर धानखेतमा गाडेको अभियोगमा एक व्यक्तिलाई पक्राउ गरिएको छ। हनुमाननगर कङ्कालिनी नगरपालिका–१ मा रहेको धानखेतमा हात्ती गाडिएको अवस्थामा भेटिएपछि अनुसन्धानका क्रममा ती व्यक्तिलाई शुक्रबार पक्राउ गरिएको हो।
कोशीटप्पु वन्यजन्तु आरक्षको नियमित गस्ती टोलीले कङ्कालिनी मन्दिरदेखि करिब एक किलोमिटर उत्तरपूर्वतर्फको धानखेतमा हात्तीलाई खाल्डोमा पुरेर गाडेको भेटेको थियो। खाल्डोमाथि परालले छोपिएको अवस्थामा हात्ती फेला परेको डिभिजन वन कार्यालय सप्तरीका प्रमुख मनोज ठाकुरले जानकारी दिए। उनका अनुसार गाडिएको हात्तीलाई बाहिर निकालेर अहिले पोष्टमार्टम भइरहेको छ।
हात्तीलाई दुई–तीन दिनअघि नै मारेर गाडिएको हुनसक्ने आशङ्का गरिएको छ। हात्तीको मृत्युको कारण भने तत्काल खुल्न सकेको छैन। कोशीटप्पु वन्यजन्तु आरक्षले घटनाबारे थप अनुसन्धान गरिरहेको डिभिजन प्रमुख ठाकुरले बताए। अनुसन्धान जारी रहेकै कारण पक्राउ गरिएका व्यक्तिको नाम भने सार्वजनिक गरिएको छैन।
