काठमाडौं । कृत्रिम बुद्धिमत्ता (एआई)सँग सम्बन्धित वस्तुको माग तीव्र रूपमा बढ्दा सिंगापुरको निर्यातमा असाधारण उछाल आएको छ । सरकारी निकाय इन्टरप्राइज सिंगापुरले शुक्रबार सार्वजनिक गरेको विवरणअनुसार सन् २०२६ को सेप्टेम्बरमा गैरतेल घरेलु निर्यात (एनओडीएक्स) अघिल्लो वर्षको सोही अवधिको तुलनामा ६८.४ प्रतिशतले बढेको छ ।
अगस्टमा एनओडीएक्स ४६.१ प्रतिशतले बढेको थियो । सेप्टेम्बरमा विद्युतीय सामग्रीको निर्यात १०७.६ प्रतिशतले वृद्धि भएको छ भने गैरविद्युतीय सामग्रीको निर्यात ५४.२ प्रतिशतले बढेको छ । एआईसँग सम्बन्धित वस्तुको बलियो मागले विद्युतीय निर्यातलाई ठूलो टेवा पुगेको विवरणमा उल्लेख छ ।
गैरतेल पुनःनिर्यात पनि सेप्टेम्बरमा अघिल्लो वर्षको तुलनामा ४७.८ प्रतिशतले बढेको छ । अगस्टमा यस्तो पुनःनिर्यात ५३.२ प्रतिशतले वृद्धि भएको थियो । पुनःनिर्यातअन्तर्गत विद्युतीय सामग्रीको निर्यात ६४.२ र गैरविद्युतीय सामग्रीको २२.१ प्रतिशतले बढेको छ ।
यसैबीच सिंगापुरको कुल वस्तु व्यापार सेप्टेम्बरमा ५०.८ प्रतिशतले बढेको छ । अगस्टमा कुल व्यापार ४४.४ प्रतिशतले बढेको थियो । सेप्टेम्बरमा निर्यात र आयात दुवैमा वृद्धि भएको इन्टरप्राइज सिंगापुरले जनाएको छ ।
