सुर्खेत । निर्माणको निर्णय भएको करिब सात वर्षपछि कर्णाली सिंहदरबारको फिल्डस्तरको काम बल्ल सुरु भएको छ । प्रदेशका छरिएर रहेका मन्त्रालयहरूलाई एउटै भवनमा समेटेर व्यवस्थित र प्रभावकारी सेवा प्रवाह गर्ने लक्ष्यसहितको यो आयोजना प्रदेश सरकारको गौरवको योजना हो ।
तत्कालीन मुख्यमन्त्री महेन्द्रबहादुर शाहीको अध्यक्षतामा २०७६ मंसिर २३ गते बसेको मन्त्रिपरिषद् बैठकले कर्णाली सिंहदरबार बनाउने निर्णय गरेको थियो । त्यतिबेला तयार भएको विस्तृत परियोजना प्रतिवेदनमा आयोजनाको लागत ५१ करोड अनुमान गरिएको थियो । तर जग्गा प्राप्तिलगायतका समस्याले काम अघि बढ्न सकेको थिएन ।
२०८१ जेठमा केन्द्रको मन्त्रिपरिषद् बैठकले एकीकृत भवन निर्माणका लागि प्रदेश सरकारलाई जमिन उपलब्ध गराउने निर्णय गरेपछि कार्यान्वयनको बाटो खुलेको हो । पछिल्लो प्रतिवेदनमा आयोजनाको लागत बढेर ४ अर्ब ६१ करोड ८९ लाख पुगेको छ । निर्माणको जिम्मा नव सिर्जनशिल कन्टेक जेभीले पाएको छ ।
कम्पनीले भ्याटबाहेक २ अर्ब ५४ करोड रुपैयाँमा असार २४ गतेदेखि काम गरिरहेको पूर्वाधार विकास निर्देशनालयका इन्जिनियर दिलिप रानाले जानकारी दिए । अहिले भूमिगत संरचनाको काम भइरहेको छ ।
३६ महिनामा निर्माण सम्पन्न गर्ने लक्ष्य रहेको यो भवन सुर्खेत उपत्यका नगर विकास समितिको स्वामित्वको १२ हजार ६५८.६० वर्ग मिटर जमिनमा बन्दैछ । ईआईए प्रतिवेदनअनुसार भवन ५ ब्लकको हुनेछ — बिचको मुख्यमन्त्री कार्यालय ब्लक ७ तलाको र अन्य ब्लक ६ देखि ७ तलाका रहनेछन् । भवनको उचाइ २९.४ मिटर हुनेछ ।
दैनिक ३ हजार ५०० भन्दा बढी कर्मचारी र सेवाग्राही धान्न सक्ने डिजाइन भएको भवनमा १२० कार र २५० दुईपाङ्ग्रे सवारी अट्ने भूमिगत पार्किङ, आगलागी सुरक्षा प्रणाली, दुईवटा दुई हजार केभीएका सब–स्टेसन र डिजेल जेनेरेटरको व्यवस्था हुनेछ ।
