अर्घाखाँचीको सन्धिखर्क नगरपालिकाले गत आर्थिक वर्ष २०८२/८३ मा खनिज र सिमेन्टसम्बन्धी आम्दानीबाट एक करोड ४७ लाख रुपैयाँभन्दा बढी भित्र्याएको छ। नगरपालिकाले बुधबार विज्ञप्तिमार्फत सार्वजनिक गरेको विवरणअनुसार भूगर्भ सिमेन्ट उद्योगबाट स्थानीय विकास शुल्कबापत ३० लाख १८ हजार रुपैयाँ प्राप्त भएको छ भने खानी तथा खनिजसम्बन्धी रोयल्टीबाट एक करोड १७ लाख ६५ हजार १६० रुपैयाँ संकलन भएको छ।प्रमुख प्रशासकीय अधिकृत प्रमोद खनालले यी दुई रकम फरक–फरक आम्दानी शीर्षकअन्तर्गत पर्ने भएकाले एउटै शीर्षकको आम्दानीका रूपमा बुझ्न नहुने प्रस्ट्याएका छन्। सिमेन्ट उद्योगबाट आउने रकम स्थानीय विकास शुल्क शीर्षकमा र खनिज उत्खननबाट आउने रकम रोयल्टी शीर्षकमा लेखिने उनको भनाइ छ।नगरपालिकाको आम्दानी विवरणलाई लिएर सामाजिक सञ्जालमा प्रश्न र टिप्पणी बढ्न थालेपछि आधिकारिक स्पष्टीकरण दिन विज्ञप्ति जारी गरिएको जनाइएको छ। खनिजसम्बन्धी रोयल्टी स्थानीय सरकारहरूका लागि महत्त्वपूर्ण आन्तरिक आम्दानीको स्रोत मानिन्छ। यस्ता रकम विकास निर्माण र सेवा प्रवाहमा खर्च गर्ने प्रचलन छ। यसले स्थानीय तहको आर्थिक स्वायत्ततालाई बलियो बनाउन मद्दत पुग्ने विश्वास गरिन्छ।