दसैंको खर्च व्यवस्थापन र चालु आर्थिक वर्षको पहिलो त्रैमासको वित्तीय दबाब सकिएपछि नेपालको सेयर बजारले पुनः गति लिएको छ। लामो समयदेखि सुस्त रहेको नेपाल स्टक एक्सचेन्ज (नेप्से) परिसूचक पछिल्ला कारोबार दिनदेखि लगातार सुधारोन्मुख देखिएको छ। साताको अन्तिम कारोबार दिन शुक्रबार परिसूचक ८.२३ अङ्कले बढेर २६३४.१७ विन्दुमा बन्द भएको छ। परिसूचकसँगै कारोबार रकममा पनि सन्तोषजनक वृद्धि देखिएको छ, जसले लगानीकर्ता बजारमा फर्किँदै गरेको सङ्केत दिन्छ। असोज मसान्त नजिकिँदा लगानीकर्तामाथि दसैं खर्च जुटाउने र बैंकको ऋणको साँवा–ब्याज तिर्ने दोहोरो दबाब थियो। त्रैमासिक अन्त्यमा ब्याज भुक्तानीका लागि सेयर बिक्री गर्ने चाप बढ्दा बजार केही समय दबाबमा पुगेको थियो। तर ह्याङओभर सकिएसँगै बिक्री चाप घटेको र खरिदकर्ताहरू हावी हुँदै गएको नेपाल इन्भेष्टर्स फोरमका अध्यक्ष तुलसीराम ढकालले बताएका छन्। तथ्याङ्कअनुसार असोज १९ गते २५६६.७६ विन्दुमा रहेको नेप्से असोज २२ मा २५७४.६५ विन्दुमा पुगेपछि लगातार ६ कारोबार दिन बढेर शुक्रबार २६३४.१७ मा आइपुगेको छ। दैनिक कारोबार रकम ३ अर्बबाट बढेर साढे ४ अर्बदेखि पौने ५ अर्बको हाराहारीमा पुगेको छ। दसैंअघिको अन्तिम कारोबार दिन शुक्रबार मात्रै ४ अर्ब ८८ करोड रुपैयाँभन्दा बढीको कारोबार भएको थियो। बैंकिङ समूहमा समेत सुधार देखिँदै छ। वाणिज्य बैंकहरूले गत आर्थिक वर्षको नाफाबाट सन्तोषजनक लाभांश घोषणा गर्न थाल्नु र आगामी वित्तीय विवरणमा सुधार आउने अपेक्षाले लगानीकर्ता यसतर्फ आकर्षित भएका हुन्। शुक्रबार नेपाल इन्भेष्टमेन्ट मेगा बैंक र कुमारी बैंक सबैभन्दा धेरै कारोबार हुने सूचिमा अग्रस्थानमा थिए। पर्याप्त तरलता, न्यून ब्याजदर, सेयर ऋणमा सुधार र पुँजीगत लाभकर घट्दा लगानीकर्ताहरू उत्साहित देखिएका छन्।