ढाका । म्यान्माको मध्य क्षेत्रस्थित एक गाउँमा सेनाले गरेको हवाई आक्रमणमा ११ जना सर्वसाधारणको मृत्यु भएको छ । मृतकमध्ये ६ जना महिला र दुई जना बालबालिका रहेको विद्रोही समूहले शनिबार जनाएको छ ।
पिपुल्स डिफेन्स फोर्स (पिडिएफ)का सदस्य बो पावका अनुसार मन्डाले सहरको दक्षिणपश्चिममा रहेको येसाग्यो टाउनसिपस्थित आफ्नो समूहको नियन्त्रण क्षेत्रमा शुक्रबार दिउँसो करिब २ बजे हमला भएको थियो । मृतकमध्ये भर्खरै हिँड्न सिक्दै गरेका एक वर्षका बालकसमेत रहेका उनले बताए ।
सुरक्षाका कारण नाम सार्वजनिक नगर्ने सर्तमा एक प्रत्यक्षदर्शीले आक्रमणपछि सडक छेउका तीनवटा घर पूर्ण रूपमा ध्वस्त भएको बताए । उनका अनुसार साइकल चलाइरहेका ११ वर्षीय विद्यार्थीसहित सबै ११ जनाको घटनास्थलमै मृत्यु भएको थियो । घटनाबारे प्रतिक्रिया लिन सेनासँग सम्पर्क हुन नसकेको समाचारमा जनाइएको छ ।
सन् २०२१ मा सैन्य ‘कू’ मार्फत नोबेल शान्ति पुरस्कार विजेता आङ सान सुकीको निर्वाचित सरकार हटाइएयता म्यान्मा गृहयुद्धको चपेटामा छ । द्वन्द्व अनुगमन संस्था ‘आम्र्ड कन्फ्लिक्ट लोकेसन एन्ड इभेन्ट डेटा’ (एक्लेड)का अनुसार युद्ध सुरु भएयता त्यहाँ एक लाखभन्दा बढी मानिसको मृत्यु भइसकेको छ ।
सैन्य ‘कू’ पछि सेनाविरुद्ध पिडिएफ गठन भएको थियो । शुरुआती चरणमा सेनाविरुद्ध उल्लेखनीय सफलता पाएको यो समूह अहिले मन्डाले आसपासका क्षेत्रमा रक्षात्मक अवस्थामा पुगेको बताइएको छ ।
