काठमाडौं । प्रतिनिधि सभाको कानुन, न्याय तथा मानव अधिकार समितिको बैठकमा सरकारमाथि गम्भीर प्रश्न उठेको छ । नेपाली कांग्रेसकी सांसद निनुकुमारी कर्णले सरकार कहाँबाट चल्दैछ र कसले चलाउँदैछ भनेर प्रश्न गरिन् ।
उनले प्रधानमन्त्रीले चारैतिर हात हालेको जस्तो देखिएको बताइन् । पछिल्लो समय सामाजिक सञ्जालमा कहिले अडियो, कहिले भिडियो र कहिले तस्बिर सार्वजनिक भइरहेको प्रसंग उठाउँदै उनले यस्तो अवस्थाको कारण के हो भनेर सोधिन् ।
सांसद कर्णले पत्रकारमाथिको धरपकडको विषय पनि उठाइन् । प्रहरी पत्रकारलाई समात्न पुग्ने र मिडिया घरमा पुगिसकेको अवस्था रहेको उनले बताइन् । गृह मन्त्रालय र प्रधानमन्त्री कार्यालयलाई थाहा छैन भन्ने कुरा सामाजिक सञ्जालबाटै बाहिर आउने गरेको उनको भनाइ छ । मिडिया राज्यको सबैभन्दा महत्वपूर्ण अङ्ग भएकाले त्यसलाई आतंकित गर्न नहुने उनले बताइन् । समाचारको सत्यतथ्य छानबिन गर्ने निकाय सरकारसँग छ कि छैन भन्ने प्रश्न पनि उनले गरिन् ।
उनले न्यायालयको विषयमा पनि चिन्ता व्यक्त गरिन् । न्यायालय देशको सर्वोच्च निकाय भए पनि सामाजिक सञ्जालमार्फत त्यसलाई आतंकित बनाइएको उनको भनाइ छ । तीस वर्षीय इनम श्रेष्ठ नामका व्यक्तिका कारण न्यायालयमाथि गम्भीर प्रश्न तेर्सिएको उल्लेख गर्दै उनले त्यसको छानबिनका लागि समिति गठन गर्न आग्रह गरिन् ।
