सर्लाही। सर्लाहीको हरिपुर नगरपालिकामा म्याजिक जिप र मोटरसाइकल एकापसमा ठोक्किँदा एक जनाको मृत्यु भएको छ। हरिपुर नगरपालिका–८ जगतपुर स्कुल नजिकै नवलपुर–मलङ्गवा सडकखण्डमा भएको यो दुर्घटनामा मोटरसाइकल चालकको ज्यान गएको हो।
प्रहरीका अनुसार असोज २४ गते बिहान नवलपुरबाट मलङ्गवातर्फ जाँदै गरेको ना १ ज ६३०८ नम्बरको म्याजिक जिपले विपरीत दिशाबाट आउँदै गरेको मधेश प्रदेश ०२–०१० प २२२१ नम्बरको मोटरसाइकललाई ठक्कर दिएको थियो। ठक्करबाट गम्भीर घाइते भएका मोटरसाइकल चालकलाई तत्काल प्रादेशिक अस्पताल मलङ्गवा पुर्याइएको थियो। तर, उपचारका क्रममा अस्पतालका चिकित्सकले उनलाई मृत घोषणा गरेका हुन्।
मृतकको पहिचान मलङ्गवा नगरपालिका–७ गणेशियाका ३० वर्षीय अरविन्द साहका रूपमा भएको छ।
दुर्घटनापछि म्याजिक चालकलाई प्रहरीले नियन्त्रणमा लिएको छ। पक्राउ पर्नेमा हरिपुर नगरपालिका–२ का ३३ वर्षीय नजामुदिन बैठा छन्। घटनाबारे थप अनुसन्धान भइरहेको प्रहरीले जनाएको छ।
