२१ कात्तिक, काठमाडौं । चालु आर्थिक वर्ष सुरु भएयताका चार महिनामा सशस्त्र प्रहरी बल, नेपालले एक करोड २१ लाख रुपैयाँभन्दा बढी मूल्यको पटका नियन्त्रणमा लिएको छ । श्रावण महिनादेखि कात्तिक २० गतेसम्मको अवधिमा देशका विभिन्न भागबाट जम्मा एक करोड २१ लाख २८ हजार छ सय ६९ रुपैयाँ बराबरको पटका जफत गरिएको बलका सहप्रवक्ता डीएसपी शैलेन्द्र थापाले बताएका छन् ।
प्रदेशअनुसार हेर्दा सबैभन्दा धेरै मधेस प्रदेशमा पटका फेला परेको छ । त्यहाँबाट ७४ लाख ३१ हजार नौ सय नौ रुपैयाँ बराबरको पटका बरामद भएको छ । लुम्बिनी प्रदेशबाट १८ लाख ३२ हजार दुई सय १२ रुपैयाँ, सुदूरपश्चिमबाट १४ लाख ८० हजार तीन सय ९८ रुपैयाँ, कोशीबाट ११ लाख ४९ हजार तीन सय ५० रुपैयाँ र बागमतीबाट दुई लाख ३५ हजार रुपैयाँ बराबरको पटका नियन्त्रणमा लिइएको छ ।
पछिल्लो एक दिनमा मात्रै थप छ लाख ५९ हजार पाँच सय ४० रुपैयाँ बराबरको पटका जफत भएको छ ।
तिहार र छठ पर्वका बेला पटका अवैध रूपमा भित्र्याउने, ओसारपसार गर्ने र बिक्री गर्ने क्रम बढ्ने भएकाले सशस्त्र प्रहरीले सीमा क्षेत्रको निगरानी र जाँचलाई कडा बनाएको छ । पर्वको समयमा अवैध पटकाको कारोबार रोक्न गस्ती र चेकजाँच तीव्र पारिएको बलले जनाएको छ ।
