केन्द्रीय बैंकको टोलीले सहकारी क्षेत्रको पहिलो चरणको जाँच पूरा गरेको छ। राष्ट्रिय सहकारी प्राधिकरणमा खटिएको नेपाल राष्ट्र बैंकको टोलीले १६ वटा संस्थाको कामकाज हेरेको हो। तीमध्ये चारवटामा विशेष जाँच गरिएको छ भने १२ वटामा गहन नियमन तथा सुपरिवेक्षण गरिएको छ।
साउनको सुरुदेखि नै यो टोली सहकारीको अनुगमनमा लागेको थियो। उपनिर्देशक गेजा पँगेनीको नेतृत्वमा रहेको १० सदस्यीय टोलीले समस्या देखिएका र ठूलो कारोबार गर्ने संस्थालाई प्राथमिकतामा राखेको थियो। सुरुमा तीन महिनाका लागि खटिएको टोलीको समय थप तीन महिना बढाइएको छ। दसैँ बिदाका कारण प्रतिवेदनको केही काम बाँकी रहेको र ६० वटा संस्थाको सुपरिवेक्षण गरेर प्रतिवेदन बुझाउने लक्ष्य रहेको पँगेनीले बताएका छन्।
जाँचका क्रममा पाँचतारा साकोस पेप्सीकोला, मिलन बहुउद्देश्यीय सहकारी, भक्तपुर पर्यटन साकोस र स्प्रिचुअल साकोस ललितपुरमा विशेष निरीक्षण गरिएको थियो। पाँचताराका सन्दर्भमा अख्तियारमा परेका तीन उजुरीका आधारमा स्थलगत जाँच गरिएको थियो। त्यस संस्थाको कर्जा फाइलमा नियामकीय मापदण्ड पूरा नभएको पाइएको र गल्ती नदोहोर्याउन निर्देशन दिइएको छ।
टोलीले धेरै संस्थामा एउटै व्यक्तिलाई प्राथमिक पूँजीको १५ प्रतिशतभन्दा बढी कर्जा गएको, धितोबिनै कर्जा दिइएको, बचत जुटाउन कमिसन दिइएको, कर्जाको प्रयोग नहेरिएको र सञ्चालक आफैँले ठूलो कर्जा लिएको पाइएको जनाएको छ। सदस्य भएको तीन महिना नपुग्दै कर्जा दिने, पूँजीकोष गणना नगर्ने र बचतसम्बन्धी नियम नमान्ने प्रवृत्ति पनि भेटिएको छ। टोलीले सम्बन्धित संस्थालाई मौखिक निर्देशन दिनुका साथै सहकारी सुपरिवेक्षण कार्यविधि बनाउने काम पनि अघि बढाएको छ।
