काठमाडौँ — नियमित गस्तीका क्रममा प्रहरीले देशका सात जिल्लाबाट लागुऔषधसहित १४ जनालाई पक्राउ गरेको छ। केन्द्रीय प्रहरी समाचारकक्षले मकवानपुर, ललितपुर, उदयपुर, कञ्चनपुर, झापा, सुनसरी र तनहुँमा छुट्टाछुट्टै कारबाही गरी नियन्त्रित औषधि तथा खैरो हेरोइनजस्तो पदार्थसहित उनीहरूलाई नियन्त्रणमा लिएको जनाएको छ।
मकवानपुरको हेटौँडा उपमहानगरपालिका–११ थानाभर्याङबाट ट्रामाडोलसहित चितवनका ३२ वर्षीय गोविन्द तामाङ र मकवानपुरकै २४ वर्षीय सफल विक्रम राणा पक्राउ परेका हुन्। ललितपुर महानगरपालिका–१८ को वाइवाई चोकबाट ट्रामाडोलसहित नवीन आले मगरसहित दुई जनालाई प्रहरीले नियन्त्रणमा लिएको छ।
उदयपुरको बेलका–८ बाट नाइट्राजेपामसहित २१ वर्षीय सरोज बर्देवा, कञ्चनपुरको बेलौरीबाट ब्राउनसुगरजस्तो पदार्थसहित ३० वर्षीय विशाल विक र २२ वर्षीय कुशल चौधरी, झापाको मेचीनगरबाट खैरो हेरोइनजस्तो पदार्थसहित ३९ वर्षीय मिलन मेचेसहित चार जना पक्राउ परेका छन्।
यसैगरी सुनसरीको इटहरीबाट ट्रामाडोल र डाइक्लोमाइनसहित ३१ वर्षीय पर्शुराम गुरुङ र २८ वर्षीय उज्ज्वल बुढाथोकीलाई पक्राउ गरी उनीहरूको दुईवटा मोटरसाइकल बरामद गरिएको छ। तनहुँको भिमादमा डेरा गरी बस्ने ३१ वर्षीय शिव मल्ल फेनारगन, डाइजेपाम र बुप्रेनोर्फिनसहित समातिएका छन्।
