राष्ट्रिय स्वतन्त्र पार्टीले स्थानीय तहमा जनप्रतिनिधि बन्न चाहनेहरूका लागि छुट्टै प्रशिक्षण पाठ्यक्रम तयार पारेको छ। नागरिकसँग प्रत्यक्ष जोडिने तहको सरकारमा काम गर्ने तयारी गरिरहेकालाई उनीहरूको जिम्मेवारी, अधिकार र काम गर्ने तरिका सिकाउनु नै यो पाठ्यक्रमको उद्देश्य हो।
पाठ्यक्रम स्थानीय सरकार सञ्चालन ऐन, पार्टीको विधान र नीति तथा चुनावी प्रतिबद्धतापत्रलाई आधार बनाएर बनाइएको छ। पार्टीको लिडरसिप एकेडेमीले तयार पारेको यो पाठ्यक्रम हाइब्रिड शैलीमा सञ्चालन हुनेछ, अर्थात् भौतिक र अनलाइन दुवै माध्यमबाट पढाइ हुनेछ। वडा सदस्यदेखि पालिका प्रमुखसम्मका सबै आकांक्षीले तोकिएको प्रशिक्षण पूरा गर्नुपर्नेछ।
प्रशिक्षणमा संविधान र संघीयताको संरचना, स्थानीय व्यवस्थापिका र कार्यपालिकाको काम, बजेट निर्माण र कार्यान्वयन, स्थानीय कर सङ्कलन तथा अनुदानका प्रकारबारे पढाइनेछ। समानीकरण, सशर्त, समपूरक र विशेष गरी चार किसिमका अनुदान, तीन तहबीचको स्रोत बाँडफाँट र अन्तर–सरकार सम्बन्ध पनि पाठ्यक्रममा समेटिएको छ।
यसबाहेक न्यायिक समितिको क्षेत्राधिकार, मेलमिलाप र फैसला लेखनको प्रक्रिया, सार्वजनिक खरिदमा देखिने बेथिति रोक्ने उपाय, डिजिटल सेवा र तथ्याङ्कमा आधारित सुशासन, विपद् व्यवस्थापन तथा सामाजिक सञ्जालको सुरक्षित प्रयोगजस्ता विषय पनि पढाइने पार्टीले जनाएको छ। जनप्रतिनिधिको व्यक्तिगत पारदर्शिता, खर्च अनुशासन र सार्वजनिक रूपमा बोल्ने सीपसमेत प्रशिक्षणको हिस्सा हुनेछ।
रास्वपाले गाउँपालिकाका आकांक्षीका लागि १ भदौदेखि र नगरपालिकाका लागि २९ असोजदेखि आवेदन खुला गरिसकेको छ। देशभर ६ महानगरपालिका, ११ उपमहानगरपालिका, २७६ नगरपालिका र ४६० गाउँपालिकाबाट कुल ३५ हजार २२१ जनप्रतिनिधि चुनिने व्यवस्था छ। महामन्त्री विपिनकुमार आचार्यको नेतृत्वमा बनेको उम्मेदवार छनोट रूपरेखामा यो पाठ्यक्रम समावेश गरिएको हो, र आवश्यकता अनुसार एकेडेमीले यसमा थपघट गर्न सक्नेछ।
