रोल्पा — प्रहरीले रोल्पाको एउटा होटेलभित्र जुवा खेलिरहेका १० जनालाई पक्राउ गरेको छ। गएराति करिब १ बजे जिल्लाको रुन्टीगढी गाउँपालिका–७, होलेरी हाटबजारस्थित एक होटेलमा जुवा खेलिरहेको अवस्थामा उनीहरूलाई नियन्त्रणमा लिइएको हो।
गोप्य सूचनाका आधारमा इलाका प्रहरी कार्यालय होलेरीबाट प्रहरी निरीक्षक मनिष थापाको नेतृत्वमा १० जनाको प्रहरी टोली खटिएको थियो। होटेल ५० वर्षीय दिलबहादुर खड्काले सञ्चालन गर्दै आएका थिए।
प्रहरीले जुवाको खालबाट एक लाख १७ हजार सात सय ५० रुपैयाँ नगद र तीन बुक तास बरामद गरेको छ। पक्राउ पर्नेमा रुन्टीगढी–६ का ३६ वर्षीय टोपबहादुर बोहरा, २१ वर्षीय प्रकाश बुढाथोकी, ३० वर्षीय शान्तराज रेउले र २३ वर्षीय कुलबहादुर रेउले छन्। त्यस्तै रुन्टीगढी–७ का ५५ वर्षीय ज्ञानबहादुर थापा, ३६ वर्षीय महेन्द्र घर्ती, ३९ वर्षीय नरसिंह रोका र ५० वर्षीय दिलबहादुर खड्का, रुन्टीगढी–५ का २४ वर्षीय देविराम विक र रुन्टीगढी–८ का ३२ वर्षीय नरबहादुर बस्नेत पनि पक्राउ परेका छन्।
प्रहरीले पक्राउ परेकाहरूलाई बुधबार सार्वजनिक गरेको छ। उनीहरूलाई बुधबारै म्याद थपका लागि अदालतमा पेस गर्ने तयारी भइरहेको प्रहरीले जनाएको छ।
