बागमती प्रदेशका पूर्वमुख्यमन्त्री इन्द्र बानियाँका छोरा दीक्षान्त बानियाँ पक्राउ परेका छन्। प्रहरीको केन्द्रीय अनुसन्धान ब्युरोले उनलाई कात्तिक १६ मा रुपन्देहीको सिद्धार्थनगर नगरपालिका वडा नम्बर ४ स्थित भैरहवाबाट पक्राउ गरेर काठमाडौं ल्याएको छ। अनुसन्धानका लागि अदालतबाट प्रहरीले चार दिनको म्याद लिएको छ।
दीक्षान्तमाथि बैंकिङ कसुर मुद्दामा अनुसन्धान भइरहेको ब्युरोका एसपी योगेन्द्रकुमार खड्काले बताएका छन्। प्रारम्भिक अनुसन्धानअनुसार प्रभु बैंकबाट लिइएको ३४ करोड रुपैयाँ ऋण दुरुपयोग भएको देखिएको छ। बानियाँ निर्माण सेवा प्रालि, बानियाँ सप्लायर्स प्रालि र भुगर्भ सिमेन्ट कम्पनीको नाममा उक्त ऋण निकासा भएको थियो।
प्रहरीको भनाइमा उक्त रकम तोकिएको प्रयोजनमा खर्च नगरी अन्य बैंक खातामा राखिएको र सेयरमा लगानी गरिएको भेटिएको छ। जुन प्रयोजनका लागि ऋण लिइएको थियो, त्यसभन्दा फरक क्षेत्रमा लगानी गरेर अपचलन गरेको प्रारम्भिक निष्कर्ष रहेको खड्काले बताए। बैंकिङ कसुर तथा सजाय ऐन, २०६४ अनुसार प्रयोजनविपरीत कर्जा दुरुपयोग गर्न मिल्दैन। सेयर ब्रोकरको खातामा रकम हालेर सेयर किनेको विषय पनि अनुसन्धानको दायरामा छ। अनुसन्धान पूरा नहुँदासम्म यी आरोप प्रारम्भिक निष्कर्षकै रूपमा रहनेछन्।
