सल्यान — शारदा नगरपालिकाले सीप भएका युवालाई श्रम बजारसँग जोड्ने उद्देश्यले ‘रोजगार बैंक’ सञ्चालनमा ल्याएको छ। दक्ष, अर्धदक्ष तथा साधारण सीप भएका युवाको विवरण संकलन गरेर उनीहरूलाई रोजगारीका अवसरसँग जोड्ने लक्ष्य राखिएको छ।
रोजगार बैंकमार्फत विशेषगरी नगरपालिकाभित्रै आवश्यक पर्ने जनशक्तिको व्यवस्थापन गर्दै स्थानीय स्तरमै रोजगारी सिर्जना गर्ने योजना छ। नगरपालिकाभित्र जनशक्ति आवश्यक परेमा रोजगार बैंकमा सूचीकृत व्यक्तिमार्फत व्यवस्थापन गरिनेछ। त्यसपछि देशभरका विभिन्न स्थानीय तह तथा निजी कार्यालयसँग समन्वय गरी वैदेशिक रोजगारीका अवसरका लागि समेत सहयोग गरिने नगरपालिकाले जनाएको छ।
नगर प्रमुख प्रकाश भण्डारीले सीपयुक्त तथा जाँगरिला युवालाई श्रम बजारसँग जोड्न रोजगार बैंक सुरु गरिएको बताए। उनका अनुसार जुनसुकै क्षेत्रको दक्ष, अर्धदक्ष वा साधारण सीप भएका युवाले नगरपालिकाको रोजगार शाखा वा सम्बन्धित वडा कार्यालयमा सम्पर्क गरी आफ्नो विवरण दर्ता गराउन सक्नेछन्।
नगरपालिकाले आफ्नो सीप, क्षमता र अनुभवअनुसारको विवरण दर्ता गराउन सम्पूर्ण नगरवासीलाई आग्रह गरेको छ।
