इलाम — सडक डिभिजन कार्यालय इलामले मेची कोरिडोरअन्तर्गत पर्ने सुखानी पक्की पुलको ठेक्का अन्त्य गरेको छ। सम्झौता भएको १४ वर्ष ४ महिनाभन्दा बढी बितिसक्दा पनि पुल नबनेपछि डिभिजनले यो कदम चालेको हो।
पुल निर्माणको जिम्मा पाएको स्काई-अजम्वर-शिवराम जेभी, काठमाडौंले पछिल्ला करिब ११ वर्षदेखि कामै नगरी कार्यस्थल छोडेको थियो। कुल एक करोड ६२ लाख रुपैयाँ लागतको यो पुल मेची कोरिडोर, अर्थात् मदन भण्डारी राजमार्गको खण्डमा पर्छ। लामो समयसम्म काम अघि नबढेपछि स्थानीय बासिन्दाले सास्ती भोग्दै आएका थिए।
डिभिजनले ठेक्का अन्त्य गर्नुका साथै काम नगर्ने निर्माण व्यवसायीलाई कालोसूचीमा राख्न सिफारिस गरेको छ। सम्झौता र सार्वजनिक खरिद कानुनअनुसार थप कारबाही पनि अगाडि बढाइएको डिभिजनले जनाएको छ।
सडक डिभिजन इलामले यसअघि पनि यस्ता अलपत्र ठेक्का अन्त्य गर्दै आएको छ। कार्यालयका अनुसार अब कुनै पनि सम्झौतालाई अनिर्णयमा राखिने छैन। जिम्मेवारी पूरा नगर्ने निर्माण व्यवसायीविरुद्ध कानुनबमोजिम कारबाही हुने र सम्बन्धित सरकारी निकायले आफ्नो दायित्व निर्वाह गर्ने डिभिजनको भनाइ छ।
ठेक्का तोडिएसँगै पुल निर्माणका लागि नयाँ प्रक्रिया अघि बढाउने बाटो खुलेको छ।
