डोल्पा — दुर्गम जिल्ला डोल्पामा स्वास्थ्य अवस्था गम्भीर बनेकी एक सुत्केरी महिलालाई नेपाली सेनाको हेलिकप्टरबाट उद्धार गरी सुर्खेत लगिएको छ। समयमै हवाई उद्धार भएपछि उनले थप उपचार पाउने भएकी छन्।
छार्काताङसोङ गाउँपालिका कागकोटकी २६ वर्षीया जुनु बुढालाई सुत्केरी व्यथाले च्यापेपछि सोमबार जिल्ला अस्पताल डोल्पा पुर्याइएको थियो। अस्पतालमा उपचार भइरहेका बेला उनको अवस्था जटिल बन्दै गएपछि चिकित्सकहरूले थप उपचारका लागि सुविधासम्पन्न अस्पताल लैजानुपर्ने सुझाव दिएका थिए।
जिल्ला प्रशासन कार्यालय डोल्पाका अनुसार हिजोदेखि गम्भीर अवस्थामा रहेकी बुढालाई मंगलबार नेपाली सेनाको हेलिकप्टरमार्फत उद्धार गरी कर्णाली प्रदेश अस्पताल सुर्खेत पठाइएको हो। सडक सञ्जालबाट टाढा रहेको डोल्पामा यस्तो अवस्थामा हवाई उद्धार नै एकमात्र भरपर्दो विकल्प हुने गरेको छ।
दुर्गम हिमाली जिल्लामा प्रसूति सेवाको पहुँच अझै चुनौतीपूर्ण छ। स्थानीय अस्पतालमा जटिल अवस्था सम्हाल्न सक्ने जनशक्ति र उपकरणको अभाव हुँदा सुत्केरी महिलालाई समयमै ठूलो अस्पताल पुर्याउनु नै जीवनरक्षाको मुख्य उपाय बन्ने गरेको स्वास्थ्यकर्मीहरू बताउँछन्।
