देशका सात जिल्लामा एकै दिन लागुऔषधसहित नौ जना पक्राउ परेका छन्। नेपाल प्रहरीको केन्द्रीय समाचार कक्षका अनुसार मोरङ, सुर्खेत, ललितपुर, उदयपुर, धनुषा, दाङ र बर्दियामा भएको कारबाहीमा उनीहरूलाई नियन्त्रणमा लिइएको हो।
मोरङको विराटनगर महानगरपालिका–१२ स्थित एक होटलबाट ४८ ग्राम पाँच मिलिग्राम ब्राउनसुगरजस्तो पदार्थ र डिजिटल तराजुसहित होटल सञ्चालक ३५ वर्षीय निकु सिंह पक्राउ परेका छन्। जिल्ला प्रहरी कार्यालय मोरङबाट खटिएको टोलीले होटल तलासी गर्दा उक्त पदार्थ फेला पारेको थियो।
सुर्खेतको वीरेन्द्रनगर नगरपालिका–३ बाट पाँच ग्राम पाँच सय ५० मिलिग्राम ब्राउनसुगरजस्तो पदार्थसहित २५ वर्षीय नितेस सुनार र २७ वर्षीय सुरेश शाही पक्राउ परे। ललितपुरको गोदावरी नगरपालिका–१४ बाट ३० ट्याब्लेट ट्रामाडोलसहित २१ वर्षीया अनिता परियारलाई नियन्त्रणमा लिइएको छ।
उदयपुरको त्रियुगा नगरपालिका–३ बाट दुई ग्राम ८० मिलिग्राम ब्राउनसुगरसहित २४ वर्षीय अर्जुन रोक्का र अर्का एक जना पक्राउ परे। धनुषाको जनकपुरबाट एक सय १० मिलिग्राम पदार्थसहित १९ वर्षीय बिजय कुमार यादव, दाङको घोराहीबाट पाँच ग्राम तीन सय मिलिग्राम पदार्थसहित ५१ वर्षीय ललितराज कुवर क्षेत्री र बर्दियाको गुलरियाबाट एक सय ६० मिलिग्राम पदार्थसहित २९ वर्षीय करण बराली पक्राउ परेका छन्। सबै घटनामा छुट्टाछुट्टै अनुसन्धान अघि बढाइएको प्रहरीले जनाएको छ।
