काठमाडौं । अस्ट्रेलियाको सबैभन्दा पुरानो डिपार्टमेन्ट स्टोर चेन डेभिड जोन्स प्रशासनमा गएको छ । स्थानीय रूपमा ‘डीजेज’ का नामले चिनिने १८८ वर्ष पुरानो खुद्रा विक्रेता लामो समयदेखि आर्थिक संकटसँग जुधिरहेको थियो । प्रशासनमा गएसँगै त्यहाँ कार्यरत करिब ६ हजार कर्मचारीको रोजगारी जोखिममा परेको छ ।
ग्राहकहरू परम्परागत पसल छोडेर अनलाइन सपिङतर्फ आकर्षित भएपछि कम्पनीको अवस्था झन् बिग्रिएको बताइएको छ । स्वैच्छिक प्रशासक म्याकग्राथ निकोलले रिसीभर एफटीआई कन्सल्टिङले कम्पनीको पुनरावलोकन नगरेसम्म डेभिड जोन्सका भौतिक तथा अनलाइन स्टोरहरू सञ्चालनमा रहने जनाएको छ ।
कम्पनीका ३८ वटा भौतिक स्टोरहरू छन्, तीमध्ये १७ वटा वेस्टफिल्ड सपिङ सेन्टरभित्र छन् । बोर्डले प्रशासनमा जाने निर्णय गर्नुभन्दा केही घण्टा अगाडि वेस्टफिल्डकी स्वामित्वकर्ता कम्पनी सेन्ट्रेले रिटेलरले अक्टोबर महिनाको भाडा नतिरेको र भाडा सम्झौता उल्लङ्घन गरेको बताएको थियो ।
रिसीभर एफटीआई कन्सल्टिङका क्रिस्टोफर हिलले वर्तमान खुद्रा व्यापारको वातावरण, बढ्दो लागत, ठूलो र पुरानो खुद्रा संरचना तथा आपूर्ति शृङ्खलाका चुनौतीहरूले गर्दा यो अवस्था आएको बताए । प्रशासक र रिसीभर नियुक्त भएपछि डेभिड जोन्सले व्यवसायको पुनर्संरचना गर्ने मौका पाउने उनको भनाइ छ ।
कम्पनीकी सीईओ एरिका बर्थोल्डले डेभिड जोन्स एक प्रतिष्ठित कम्पनी भएको र धेरै अस्ट्रेलियालीहरूको डीजेजका स्टोरहरूसँग आफ्नै कथा र सम्झनाहरू जोडिएको बताइन् । उनले ब्रान्डसँग भविष्यका लागि व्यापारलाई पुनः सेट गर्ने राम्रो योजना रहेको पनि बताइन् ।
धेरै अस्ट्रेलियालीहरूका लागि डेभिड जोन्स र यसको ट्रेडमार्क कालो र सेतो ‘हाउन्डसटुथ’ डिजाइन विलासिताको प्रतीक थियो । तर म्याक्वेरी युनिभर्सिटी बिजनेस स्कुलकी मार्केटिङ प्राध्यापक जाना बाउडनका अनुसार यसको पतनले डिपार्टमेन्ट स्टोर मोडलको अन्त्यको संकेत गरेको छ । सन् १९५४ मा महारानी एलिजाबेथ द्वितीयले सिड्नीको पहिलो भ्रमणका क्रममा एलिजाबेथ स्ट्रिट स्टोरको सातौँ तलाको ब्यान्क्वेट डिनरमा सहभागिता जनाएकी थिइन् ।
