टेस्लाले आफ्नो चर्चित विद्युतीय पिकअप ट्रक साइबरट्रकको उत्पादन घटाउने भएको छ। कम्पनीका प्रमुख कार्यकारी एलन मस्कले आगामी वर्षको मध्यतिरबाट अमेरिकाको टेक्सासस्थित गिगाफ्याक्ट्रीमा यसको उत्पादन क्रमशः बन्द गरिने बताएका छन्।
मस्कले शुक्रबार सामाजिक सञ्जाल एक्समार्फत यो निर्णय सार्वजनिक गरेका हुन्। बजारमा अपेक्षित लोकप्रियता हासिल गर्न नसकेपछि कम्पनीले यस्तो कदम चालेको हो। साइबरट्रकको उत्पादन घटाएर खाली हुने क्षमतामा कम्पनीले हालै सार्वजनिक गरेको चालकविहीन ट्याक्सी साइबरक्याबको उत्पादन बढाउने उनको भनाइ छ।
तर साइबरट्रकको उत्पादन अन्य कारखानामा सारिने हो वा पूर्ण रूपमा बन्द गरिने हो भन्ने अझै स्पष्ट भएको छैन। हालसम्म यो गाडीका विशेष पार्टपुर्जा बनाउन सक्ने टेस्लाको एकमात्र ज्ञात कारखाना टेक्सासको अस्टिनस्थित गिगाफ्याक्ट्री हो। यस विषयमा समाचार संस्था रोयटर्सले प्रतिक्रिया माग्दा टेस्लाले तत्काल जवाफ दिएको छैन।
मस्कले साइबरक्याबलाई टेस्लाको भविष्यको प्रमुख स्वचालित सवारीसाधनका रूपमा अघि सारेका छन्। उनी टेस्लालाई विद्युतीय सवारीसाधन निर्माता कम्पनीबाट रोबोटिक्स र स्वचालित प्रविधिमा केन्द्रित कम्पनीका रूपमा रूपान्तरण गर्न चाहन्छन्। साइबरट्रकका प्रमुख इन्जिनियर वेस मोरिलका अनुसार यसमा विकसित प्रविधि साइबरक्याबमार्फत निरन्तर प्रयोगमा रहनेछ।
मस्कले सन् २०२३ मा साइबरट्रक सार्वजनिक गर्दा यसलाई जनरल मोटर्स र फोर्डका परम्परागत पिकअप ट्रकको भविष्यको प्रतिस्पर्धीका रूपमा प्रस्तुत गरेका थिए। तर यही असामान्य कोणीय बनावट र स्टेनलेस स्टिलको बाहिरी संरचना बजार विस्तारमा चुनौती बन्यो। धेरैले यसको डिजाइनलाई विवादास्पद र असामान्य ठाने। युरोपका केही देशमा स्टेनलेस स्टिल संरचना र धारिला बाहिरी किनाराका कारण नियामक निकायबाट आवश्यक स्वीकृति प्राप्त गर्न समस्या भयो। त्यसबाहेक साइबरट्रकले पटक–पटक प्राविधिक समस्या र गुणस्तर नियन्त्रणसम्बन्धी चुनौती सामना गर्नुपरेको छ। विभिन्न समयमा गाडी फिर्ता बोलाएर सुधार गर्नुपर्ने अवस्था आयो र कम्पनीले यसको मूल्यमा समेत पटक–पटक परिवर्तन गरेको छ।
टेस्लाले साइबरट्रकको छुट्टै बिक्री विवरण सार्वजनिक गर्दैन। कम्पनीले यसलाई अन्य मोडलसँगै ‘अदर मोडल्स’ शीर्षकमा राखेर बिक्री तथ्याङ्क सार्वजनिक गर्ने गरेको छ। रोयटर्सका अनुसार सन् २०२६ को तेस्रो त्रैमासिकमा टेस्लाका अन्य मोडलहरूको कुल डेलिभरी आठ हजार २९५ थियो भने दोस्रो त्रैमासिकमा यस्तो सङ्ख्या १२ हजार ३६४ रहेको थियो। यद्यपि यो तथ्याङ्क साइबरट्रकको मात्र बिक्री होइन।
