काठमाडौँ । चालु आर्थिक वर्ष २०८३/८४ को पहिलो तीन महिनामा नेपालले विद्युत् निर्यातबाट १६ अर्ब रुपैयाँभन्दा बढी आम्दानी गरेको छ । नेपाल विद्युत् प्राधिकरणको यो कारोबार ऊर्जा, जलस्रोत तथा सिँचाइ मन्त्रालयले सार्वजनिक गरेको पछिल्लो १५ दिनको कार्यप्रगतिमा उल्लेख छ ।
मन्त्रालयका अनुसार साउन, भदौ र असोज गरी पहिलो त्रैमासमा विद्युत् निर्यातबाट कुल १६ अर्ब १५ करोड १३ लाख रुपैयाँ बराबरको कारोबार भएको छ । यसमध्ये असोज महिनामा मात्रै भारततर्फ ६३ करोड ३९ लाख युनिट विद्युत् पठाइएको थियो, जसबाट प्राधिकरणले ५ अर्ब ९२ करोड ५० लाख रुपैयाँ आम्दानी गरेको छ ।
भारतको बजारमा थप विद्युत् पठाउने बाटो पनि खुलेको छ । मन्त्रालयले थप ३१ मेगावाट विद्युत् निर्यात गर्ने अनुमति प्राप्त भएको जनाएको छ । नयाँ स्वीकृतिसँगै भारततर्फ विद्युत् निर्यातका लागि नेपालको कुल क्षमता करिब १ हजार १७९ मेगावाट पुगेको छ ।
यसैबीच, बाढीका कारण रोकिएको बङ्गलादेशतर्फको विद्युत् निर्यात पनि फेरि सुरु भएको छ । मन्त्रालयका अनुसार बङ्गलादेशतर्फको ४० मेगावाट विद्युत् निर्यात पुनः सुचारु गरिएको छ ।
वर्षायाममा उत्पादन हुने अतिरिक्त विद्युत् छिमेकी मुलुकमा बेचेर नेपालले उल्लेख्य आम्दानी गरिरहेको छ । निर्यात क्षमता बढ्दै जाँदा ऊर्जा व्यापारबाट देशको अर्थतन्त्रमा थप योगदान पुग्ने अपेक्षा गरिएको छ ।
