कुकुरप्रतिको माया र कुकुर तिहारको महत्वलाई संसारभर चिनाउने उद्देश्यसहित सरकारले एउटा नयाँ प्रतियोगिता घोषणा गरेको छ । संस्कृति, पर्यटन तथा नागरिक उड्डयन मन्त्रालयले पहिलोपटक ‘कुकुर तिहार रील प्रतियोगिता–२०८२’ सञ्चालन गर्न लागेको हो । प्रतियोगितामा उत्कृष्ट ठहरिने रील बनाउनेलाई एक लाख रुपैयाँ पुरस्कार दिइनेछ ।
नेपालको मौलिक कला, संस्कृति र परम्परालाई अन्तर्राष्ट्रिय स्तरमा चिनाउने अभियानअन्तर्गत यो प्रतियोगिता आयोजना गर्न लागिएको मन्त्रालयले जनाएको छ । कुकुरलाई विशेष पूजा गर्ने परम्परा नेपालको आफ्नै पहिचान हो । मान्छे र कुकुरबीचको घनिष्ठ सम्बन्धलाई डिजिटल सामग्रीमार्फत विश्वसामु पुर्याउनु नै प्रतियोगिताको मुख्य उद्देश्य हो ।
सहभागी हुन चाहनेले कुकुर तिहारसँग सम्बन्धित मौलिक र रचनात्मक भिडियो बनाउनुपर्नेछ । तयार भएको रील आफ्नो फेसबुक वा इन्स्टाग्राममा पोस्ट गर्नुपर्छ । पोस्ट गर्दा अंग्रेजीमा #NepalTourism र #KukurTihar ह्यासट्याग लेख्नुपर्नेछ । इन्स्टाग्राममा @nepaltourism लाई ट्याग गर्नुपर्छ भने फेसबुकमा नेपाल पर्यटन बोर्डको आधिकारिक पेज ट्याग गर्नुपर्नेछ ।
प्रतियोगिताका लागि बनाइने रीलमा अंग्रेजी सबटाइटल वा अंग्रेजी भ्वाइसओभर अनिवार्य गरिएको छ । सामाजिक सञ्जालमा पोस्ट गरेको भिडियोको गुगल ड्राइभ लिंक photonepa@ntb.org.np मा इमेलमार्फत पठाउनुपर्नेछ । लिंक पठाउँदा डाउनलोड र हेर्न मिल्ने अनुमति दिएको हुनुपर्छ । सहभागिताका लागि सन् २०२६ नोभेम्बर २१ सम्मको समय तोकिएको छ ।
