सर्लाही र रौतहटमा सिँचाइ सुविधा पुर्याउँदै आएको बागमती सिँचाइ आयोजनाका ज्यालादारी कर्मचारीले उमेर हद खारेजीको माग गर्दै धर्ना थालेका छन् । २५ देखि ३० वर्षदेखि निरन्तर काम गर्दै आएका आफूहरूलाई ५८ वर्षे उमेर हद लगाएर सेवाबाट हटाउन खोजिएको भन्दै उनीहरूले सोमबारदेखि सर्लाहीको कर्मैयास्थित आयोजनाको कार्यालय गेटमा धर्ना सुरु गरेका हुन् ।
आन्दोलनमा बागमती सिँचाइ आयोजनाका २४४ जना र बागमती–मनुष्मारा–झाँझ सिँचाइ व्यवस्थापन कार्यालय कर्मैयाका २० जना गरी २६४ कर्मचारी सहभागी छन् । उनीहरूले उमेर हद हटाउनुका साथै कात्तिक ११ गते प्रकाशित सेवा सर्त सुधार गर्न र आयोजनाले २०७५ वैशाख ३१ गते गठन गरेको समितिको सेवा–सुविधासम्बन्धी प्रतिवेदन कार्यान्वयन गर्न माग गरेका छन् ।
चाडपर्व खर्च, पोसाक तथा महँगी भत्ताको व्यवस्था गर्न र सामाजिक सुरक्षा कोषमा आबद्ध गराउनुपर्ने उनीहरूको अर्को माग छ । माग पूरा नभए मंसिर १ गतेदेखि कार्यालयमा तालाबन्दी गर्ने चेतावनी कर्मचारीले दिएका छन् । पहिलो चरणमा कात्तिक २० गतेसम्म कार्यालय समयमा कालोपट्टी बाँधेर धर्ना दिने कार्यक्रम रहेको बागमती सिँचाइ आयोजना ज्यालादारी कर्मचारी समितिका अध्यक्ष विनोदकुमार पासवानले जानकारी दिए ।
कार्यालय र सिँचाइ नहरको काम प्रभावित नहोस् भनेर सर्लाही र रौतहटमा कार्यरत कर्मचारी आलोपालो गरी धर्नामा बसेका छन् । आयोजनामा नहरको रेखदेख, माली, सुरक्षागार्ड, चालक, प्लम्बर तथा सरसफाइका काममा ज्यालादारी कर्मचारी कार्यरत छन् ।
यता आयोजनाकी शाखा अधिकृत सुमना पारुईले नहर सञ्चालनसम्बन्धी नयाँ मापदण्ड अद्यावधिक भएर आएकाले उमेरको मापदण्ड अनिवार्य गरिएको बताइन् । उनका अनुसार यसअघि ज्यालादारी कर्मचारीका लागि उमेर हद तोकिएको थिएन ।
