१८ कात्तिक, काठमाडौं । सरकारले नेपाल प्रहरीको सर्वोच्च पदमा एआईजी मनोज केसीलाई नियुक्त गर्ने निर्णय गरेको छ । आज बसेको मन्त्रिपरिषद्को बैठकले केसीलाई प्रहरी महानिरीक्षक (आईजीपी) बनाउने निर्णय गरेको हो ।
केसी हाल नेपाल प्रहरीको अपराध अनुसन्धान विभागको प्रमुखको रूपमा कार्यरत छन् । उनी लामो समयदेखि अपराध अनुसन्धानको क्षेत्रमा काम गर्दै आएका अनुभवी अधिकृत हुन् ।
बैठकले हालका महानिरीक्षक दानबहादुर कार्कीलाई प्रधानमन्त्रीको विशेष सुरक्षा सल्लाहकारको जिम्मेवारी दिने निर्णय पनि गरेको छ । कार्कीलाई आईजीपी पदबाट हटाएर सल्लाहकारको भूमिकामा पठाइएको हो ।
नेपाल प्रहरीमा आईजीपीलाई हटाएर सुरक्षा सल्लाहकार बनाइने यो पहिलो घटना होइन । यसअघि अच्युत कृष्ण खरेललाई आईजीपीबाट हटाएर राष्ट्रिय अनुसन्धान विभागमा सरुवा गरिएको थियो । उनी त्यहाँ हाजिर हुन नगई सर्वोच्च अदालत गएका थिए । सर्वोच्चबाट मुद्दा जितेपछि उनी पुनः आईजीपी भएका थिए । त्यसपछि ध्रुवबहादुर प्रधानलाई आईजीपी बनाइएको थियो भने पछि उनलाई पनि प्रधानमन्त्रीको विशेष सुरक्षा सल्लाहकारमा सरुवा गरिएको थियो ।
त्यस्तै, रमेश चन्द ठकुरीलाई पनि सुडान घोटाला काण्डमा मुछिएको भन्दै सुरक्षा सल्लाहकारमा सरुवा गरिएको थियो । उनको ठाउँमा रवीन्द्र प्रताप शाह आईजीपी बनेका थिए ।
