काठमाडौं । नेकपा एमालेकी सांसद साजिदा खातुन सिद्धिकीले प्रधानमन्त्री बालेन शाहलाई पत्र लेख्दै देशको वर्तमान अवस्थाप्रति चिन्ता व्यक्त गरेकी छन् । प्रतिनिधिसभा अन्तर्गत कानुन, न्याय तथा मानव अधिकार समितिको बैठकमा उनले पत्र पढेर सुनाएकी थिइन् ।
पत्रमा उनले सामाजिक सञ्जालमा व्यक्त गरिने कुरा र दिइने आश्वासनले मात्रै देश चल्न नसक्ने बताएकी छन् । देश चलाउन जिम्मेवार नेतृत्व, स्पष्ट कार्ययोजना, दूरदर्शी सोच र समयमै लिइने सही निर्णय आवश्यक पर्ने उनको भनाइ छ ।
पछिल्लो समय मुलुकका विभिन्न क्षेत्रमा अन्योल र अनिश्चितता देखिएको भन्दै उनले आम नागरिकमा बढिरहेको चिन्ता र असुरक्षाको भावनालाई हल्का रूपमा लिन नहुने बताएकी छन् । सरकारले नागरिकको सुरक्षा, शान्ति र सुशासन, रोजगारी, आर्थिक स्थायित्व तथा संविधानको प्रभावकारी कार्यान्वयनलाई पहिलो प्राथमिकतामा राख्नुपर्ने उनले पत्रमा उल्लेख गरेकी छन् ।
प्रधानमन्त्रीलाई वर्तमान परिस्थितिलाई गम्भीरतापूर्वक लिन आग्रह गर्दै उनले राजनीतिक अभिव्यक्तिभन्दा कामलाई प्राथमिकता दिन अनुरोध गरेकी छन् । निकायहरूलाई जिम्मेवार बनाउन र जनतामा विश्वास जगाउने ठोस कदम चाल्न पनि उनले आग्रह गरेकी छन् ।
सरकारलाई सचेत गराउनु विरोध नभई देशप्रतिको जिम्मेवारी भएको भन्दै उनले आरोप–प्रत्यारोपमा समय बिताउने बेला नभएको र सम्भावित संकटबाट देशलाई जोगाउनुपर्ने बताएकी छन् । देशमा शान्ति होस्, जनता सुरक्षित रहून् र राष्ट्र सही दिशामा अगाडि बढोस् भन्ने सबैको साझा चाहना रहेको उनले पत्रमा उल्लेख गरेकी छन् ।
