काठमाडौँ । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले जनमतको आडमा मुलुकमा सर्वसत्तावाद स्थापित हुने खतरा देखा परेको बताएका छन् ।
बुधबार काठमाडौँमा आयोजित शुभकामना आदानप्रदान कार्यक्रममा लिङ्देनले प्रहरी महानिरीक्षक हटाउनेदेखि विभिन्न निकायका कर्मचारीलाई प्रधानमन्त्री कार्यालयमा थुन्नेसम्मका घटनाले यस्तो खतरा देखाएको बताए ।
विधि, नियम र आदेशभन्दा पनि लहडको भरमा मुलुक चल्न थाले गम्भीर सर्वसत्तावादको सिकार हुने जोखिम बढ्ने उनको भनाइ थियो । देशलाई दुर्घटनाबाट जोगाउन राप्रपा रहन, बलियो हुन र जित्न जरुरी रहेको उनले बताए ।
आगामी समयको नेतृत्वका लागि राप्रपा तयार हुनुपर्ने भएकाले कार्यकर्ताले निराश हुनुपर्ने अवस्था नरहेको लिङ्देनको धारणा थियो । उनले पार्टीलाई व्यक्तिगत र सत्ता स्वार्थबाट मुक्त गर्दै अघि बढ्नुपर्नेमा जोड दिए ।
