ढाका — पाँच दिनदेखि जारी आन्दोलनपछि बङ्गलादेशको गार्मेन्ट ज्याला बोर्डले मजदुरको न्यूनतम तलब बढाउने विषयमा सहमति जनाएको छ। बुधबार बोर्डले तलब वृद्धिको निर्णय गर्ने प्रतिबद्धता जनाएको हो।
शनिबारदेखि हजारौँ मजदुरले तलब बढाउनुपर्ने माग गर्दै गाजीपुर, मिरपुर, नारायणगञ्ज र सावरका औद्योगिक क्षेत्रमा प्रदर्शन गरिरहेका छन्। प्रदर्शनका क्रममा केही ठाउँमा इँटा प्रहार र सडक अवरुद्ध भएपछि प्रहरीले भीड नियन्त्रण गर्न अश्रुग्यास प्रयोग गरेको थियो।
मजदुरहरूले हालको मासिक न्यूनतम तलब १२ हजार ५०० टाकाबाट बढाएर ३० हजार टाका पुर्याउन माग गरेका छन्। यो रकम करिब २४० अमेरिकी डलर बराबर हो र हालको तलबभन्दा १४० प्रतिशत बढी हो। बोर्डमा मजदुरका प्रतिनिधि बाबुल अख्तरले डिसेम्बरभित्रै निर्णय हुनुपर्ने बताए। उनका अनुसार त्यसो भए जनवरीदेखि परिमार्जित तलब पाउन सकिनेछ। कारखाना मालिकका प्रतिनिधि पनि सहमत भएका छन्।
तर तलब कति बढाउने भन्नेमा भने अझै टुंगो लागेको छैन। सरकारले आइतबार रोजगारदाता र मजदुरका प्रतिनिधि सम्मिलित ज्याला बोर्ड गठन गरेको थियो। बङ्गलादेश गार्मेन्ट म्यानुफ्याक्चरर्स एन्ड एक्सपोर्टर्स एसोसिएसनका प्रतिनिधि एबीएम शम्सुद्दिनले डिसेम्बरभित्रै बोर्डको काम पूरा हुने बताएका छन्।
बङ्गलादेशमा मुद्रास्फीति करिब आठ प्रतिशत रहेकाले खाद्यान्न, आवास, यातायात र स्वास्थ्य सेवाको मूल्यवृद्धिले मजदुरको क्रयशक्ति घटाएको छ। चीनपछि विश्वकै दोस्रो ठूलो तयारी पोसाक निर्यातकर्ता बङ्गलादेशमा ४० लाखभन्दा बढी मानिस गार्मेन्ट क्षेत्रमा कार्यरत छन्। यो क्षेत्रले मुलुकको कुल निर्यात आम्दानीको करिब ८० प्रतिशत हिस्सा ओगटेको छ भने वार्षिक निर्यात मूल्य ३८ अर्ब अमेरिकी डलर रहेको छ। अमेरिकी बजार यस उद्योगको सबैभन्दा ठूलो एकल बजार हो भने युरोपेली सङ्घ सबैभन्दा ठूलो व्यापारिक समूह हो।
नारायणगञ्जका औद्योगिक प्रहरी अधीक्षक अब्दुल्लाह अल महमूदले प्रदर्शनकारीहरूले केही कारखानामा तोडफोड गरेको बताए। गाजीपुरका औद्योगिक प्रहरी अधीक्षक अमजद हुसेनले त्यहाँको अवस्था तनावपूर्ण रहेको जानकारी दिए।
