ललितपुर — सहरमा बालबालिकाले खेल्दै रमाउँदै पढ्न पाउने ठाउँको अभावबीच ललितपुरको भनिमण्डलमा एउटा बाल पुस्तकालय सञ्चालनमा छ, जहाँ नानीबाबुहरूले किताब पढ्नुका साथै घर पनि लैजान पाउँछन्। बालसाहित्यकार अनुराधाको अगुवाइमा सञ्चालित ‘सारथी बाल पुस्तकालय’ मा यहाँका सबै सेवा निःशुल्क छन्।
सारथी नेपालको कार्यालय रहेको भवनमा सन् २०२४ को फेब्रुअरीदेखि सुरु भएको यो पुस्तकालयमा अहिले करिब तीन हजारदेखि तीन हजार पाँच सयसम्म पुस्तक छन्। तीमध्ये अंग्रेजी भाषाका पुस्तक बढी छन् भने नेपाली भाषाका पनि केही छन्। रोचक कुरा, पुस्तकालयका कुनै पनि पुस्तक किन्न संस्थाले बजेट खर्च गर्नुपरेको छैन—बालपुस्तक प्रकाशकहरू र अमेरिकी नागरिक बेथ ब्रुस्टरले संकलन गरेर दिएका पुस्तकले नै पुस्तकालय भरिएको छ।
पुस्तकालयमा महिनामा दुई पटक ‘एकादेशमा’ नामक कथा वाचन तथा सिर्जनात्मक कार्यक्रम हुन्छ, जसमा लेखक, चित्रकार र नाटककर्मीहरू स्वयं आएर बालबालिकालाई कथा सुनाउँछन्। कथा सुन्नुका साथै चित्र कोर्ने, फेस पेन्टिङ गर्ने र खाजा खाने रमाइलो माहोल यहाँ बन्छ। शनिबार कथाकार तथा साहित्यकारहरूबाट कथा सुन्ने अवसर पनि मिल्छ।
अभिभावकहरू आफ्ना साना नानीहरूलाई यहाँ ढुक्कसँग छोडेर काममा निस्कन सक्छन् वा भित्रै ल्यापटप खोलेर काम गर्दै चिया कफी पिउन सक्छन्। सारथी नेपाल २०७२ सालको भूकम्पपछि सुरु भएको अभियान हो र सन् २०२३ मा औपचारिक रूपमा दर्ता भएको थियो। संस्थाले नेदरल्यान्ड्सको थाङ फाउन्डेसनसँग मिलेर उपत्यकाबाहिरका पाँच जिल्लामा पुस्तकालय स्थापना गरिसकेको छ। हालै रसुवाका बाढीपीडित बालबालिकाका लागि स्वयम्भूस्थित येल्लो गुम्बामा पुगेर पनि यस्तै कार्यक्रम आयोजना गरिएको थियो।
