दाङमा अण्डा उत्पादन फेरि बढ्न थालेको छ । किसानहरू सङ्गठित भएर बजारीकरणमा लागेपछि जिल्लामा दैनिक दुई हजार ५०० कार्टुनभन्दा बढी अण्डा उत्पादन हुन थालेको हो ।
कुनै बेला दाङमा दैनिक पाँचदेखि छ हजार कार्टुनसम्म अण्डा उत्पादन हुन्थ्यो । तर उचित बजारको अभावमा उत्पादन घट्दै गएर एक हजार कार्टुनमा सीमित भएको थियो । किसानहरू सङ्गठित भएर बजारीकरणमा जुटेपछि भने उत्पादन पुनः उकालो लागेको हो ।
नेपाल लेयर्स कुखुरापालक सङ्घका अध्यक्ष ईश्वरप्रकाश श्रेष्ठका अनुसार किसान सङ्गठित नहुँदा उत्पादन न्यून मूल्यमा बेच्नुपर्ने अवस्था थियो, जसले लामो समय घाटा व्यहोर्न बाध्य पारेको थियो । अहिले सङ्गठित भएपछि उत्पादन विस्तारै बढ्न थालेको उनले बताए । एउटा कार्टुनमा २१० वटा अण्डा हुन्छन् ।
जिल्लामा लेयर्स कुखुराको सङ्ख्या नौ लाखभन्दा बढी पुगेको छ । सङ्घका सचिव रविन्द्रविक्रम केसीका अनुसार सङ्घमा १५० भन्दा बढी किसान आबद्ध छन् भने हरेक वर्ष ४५ जनाभन्दा बढी नयाँ किसान थपिने गरेका छन् ।
दाङमा उत्पादित अण्डामध्ये २० प्रतिशत अर्थात् दैनिक करिब ५०० कार्टुन जिल्लामै खपत हुन्छ । बाँकी ८० प्रतिशत अर्थात् दुई हजार कार्टुन जिल्ला बाहिरका बजारमा पठाइने गरिएको छ ।
अण्डाको बजारीकरण व्यवस्थित गर्न सङ्घ र नेपाल एग ट्रेडिङ प्रालिको सहकार्यमा तुलसीपुरमा डिपो सञ्चालन गरिएको छ । जिल्लामा खपत हुन नसकेको अण्डा डिपोमार्फत अन्य जिल्लामा पठाउने गरिएको छ ।
एउटा अण्डाको लागत मूल्य १९ रुपैयाँ १२ पैसा पर्ने भए पनि किसानले सोभन्दा कम मूल्यमा बिक्री गर्नुपर्ने अवस्था रहेकाले एकद्वार प्रणालीमार्फत बजारीकरण गर्न डिपो सञ्चालन गरिएको सङ्घका केन्द्रीय अध्यक्ष विनोद पोख्रेलले बताए । जिल्लामा बिक्री हुन नसकेको अण्डा डिपोमार्फत देशका विभिन्न बजारमा पठाउने व्यवस्था मिलाइएको उनले जानकारी दिए ।
